ທະນາຄານໂລກ ສະໜອງທຶນຄຸ້ມຄອງຄວາມສ່ຽງຈາກໄພພິບັດ

ທະນາ​ຄານ​ໂລກ ໄດ້​ເຊັນ​ສັນຍາ​ການສະໜອງ​ທຶນ ຈຳນວນ 30 ລ້ານໂດ​ລາ​ສະຫະລັດ ຫຼື ປະມານ 240 ຕື້​ກີບ ສຳລັບ​ໂຄງການ​ຄຸ້ມຄອງ​ຄວາມ​ສ່ຽງ​ຈາກ​ໄພພິບັດ​ໃນອາຊີ​ຕາເວັນ​ອອກສຽງ​ໃຕ້ ສຳລັບ ​ສປປ ລາວ

ກະຊວງ​ການ​ເງິນ ແລະ ທະນາ​ຄານ​ໂລກ ໄດ້​ເຊັນ​ສັນຍາ​ການສະໜອງ​ທຶນ ຈຳນວນ 30 ລ້ານໂດ​ລາ​ສະຫະລັດ ຫຼື ປະມານ 240 ຕື້​ກີບ ສຳລັບ​ໂຄງການ​ຄຸ້ມຄອງ​ຄວາມ​ສ່ຽງ​ຈາກ​ໄພພິບັດ​ໃນອາຊີ​ຕາເວັນ​ອອກສຽງ​ໃຕ້ ສຳລັບ ​ສປປ ລາວ ເຊິ່ງ​ຈະ​ລົງທຶນ​ໃນວຽກ​ງານ​ຄຸ້ມ​ຄອງ​ຄວາມ​ສ່ຽງຈາກ​ໄພ​ນ້ຳ​ຖ້ວມ​ໃນ​ຕົວ​ເມືອງ​ຢູ່ແຂວງ​ອຸດົມ​ໄຊ ແລະ ໃນ​ວຽກງານ​ບໍລິການ​ດ້ານ​ອຸ​ທົກ​ກະ​ສາດ-ອຸຕຸນິຍົມ​ທີ່​ເຊື່ອ​ຖື​ໄດ້​ໃນ​ທົ່ວ​ປະເທດ ທຶນ​ດັ່ງກ່າວ​ໄດ້​ລວມ​ເອົາທຶນ​ຊ່ວຍເຫຼືອຈຳນວນ 1 ລ້ານໂດ​ລາ​ສະຫະລັດ ຫຼື ປະມານ 8 ຕື້​ກີບ ຈາກ​ກອງ​ທຶນ​ຄ້ຳປະກັນຄວາມ​ສ່ຽງຈາກ​ໄພພິບັດ​ຢູ່​ຕາເວັນ​ອອກສຽງ​ໃຕ້ ເຊິ່ງ​ເປັນ​ກອງທຶນ​ຊ່ວຍເຫຼືອ​ແບບ​ຫຼາຍ​ຝ່າຍ​ທີ່ຈະ​ຖືກ​ນຳ​ໃຊ້ ເພື່ອ​ຊ່ວຍ​ກະຊວງການ​ເງິນ​ໃນ​ການ​ກະກຽມ ແລະ ຈັດ​ຕັ້ງ​ປະຕິບັດ​ເຄື່ອງມື​ການ​ສະໜອງ​ທຶນ​ສຳລັບ​ຄວາມ​ສ່ຽງ​ຈາກໄພພິບັດ. ທ່ານ ຊ໋ອງ​ຄຣິສ ໂຕບ​ກາ​ເຣ ຜູ້ຕາງໜ້າ​ທະນາຄານ​ໂລກ​ປະຈຳ ​ສປປ ລາວ ຄົນ​ໃໝ່​ກ່າວ​ວ່າ: ໂຄງການ​ນີ້​ຄາດ​ວ່າ​ຈະ​ນຳ​ເອົາຜົນ​ປະໂຫຍດ​ໂດຍ​ກົງ​ມາສູ່​ປະຊາຊົນ​ຈຳນວນ 1 ແສນ​ຄົນ ຢູ່​ເຂດເມືອງ​ໄຊຂອງ​ແຂວງ​ອຸດົມ​ໄຊ ໂດຍ​ຜ່ານ​ການ​ຄຸ້ມ​ຄອງ​ຄວາມສ່ຽງ​ຈາກ​ໄພພິບັດ​ນ້ຳ​ຖ້ວມ​ໃນ​ຕົວເມືອງ ​ທີ່​ຈະ​ຊ່ວຍ​ຫຼຸດຜ່ອນ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ ປະກອບ​ກັບການ​ອອກ​ແບບ​ທີ່​ປະດິດ​ສ້າງ​ໃໝ່ ທີ່​ຈະ​ຄຳນຶງ​ເຖິງ​ວິທີ​ການ​ດ້ານ​ພື້ນຖານ​ໂຄງ​ລ່າງ​ແບບ​ອະເນກ​ປະສົງ ແລະ ສີຂຽວ ແລະ ໂຄງການນີ້​ຈະ​ຊ່ວຍ​ໃຫ້ ​ສປປ ລາວ ໂດຍລວມໄດ້​ຮັບ​ຜົນ​ປະໂຫຍດ​ຈາກລະບົບ​ເຕືອນ​ໄພ​ລ່ວງ​ໜ້າ ແລະ ກົນ​ໄກ​ການ​ສະໜອງ​ທຶນ ເພື່ອການ​ຟື້ນ​ຟູ​ຄືນ​ຈາກ​ຜົນ​ກະທົບຂອງ​ໄພພິບັດ​ທີ່​ມີ​ປະສິດທິພາບ ໂຄງການ​ດັ່ງກ່າວ​ເປັນ​ສ່ວນ​ໜຶ່ງຂອງ​ແຜນ​ງານ​ຄຸ້ມ​ຄອງ​ຄວາມສ່ຽງ​ຈາກ​ໄພພິບັດ ​ໃນ​ພາກ​ພື້ນ​ຕາເວັນ​ອອກສຽງ​ໃຕ້ ທີ່​ໄດ້​ຮັບ​ທຶນຈາກ​ທະນາຄານ​ໂລກ ​ທີ່​ກວມ​ເອົາທັງ​ໂຄງການ​ຢູ່​ປະເທດ​ກຳປູເຈຍ ແລະ ປະເທດ​ມຽນ​ມາ. ພິທີ​ເຊັນ​ສັນຍາ​ການ​ສະໜອງທຶນ ໄດ້​ມີ​ຂຶ້ນ​ວັນ​ທີ 30 ສິງຫາ 2017 ຢູ່​ທີ່​ກະຊວງ​ການ​ເງິນ ລະຫວ່າງທ່ານ​ນາງ ທິບ​ພະ​ກອນ ຈັນທະ​ວົງສາ ຮອງ​ລັດຖະມົນຕີກະຊວງ​ການ​ເງິນ ແລະ ທ່ານ ຊ໋ອງ​ຄຣິສ ໂຕບ​ກາ​ເຣ ເຊິ່ງ​ມີພາກສ່ວນ​ທີ່​ກ່ຽວຂ້ອງ​ສອງ​ຝ່າຍ ເຂົ້າ​ຮ່ວມ​ເປັນ​ສັກຂີ​ພິຍານ.

ເນື້ອໃນ: ວຽງຈັນໃໝ່