ປະທານປະເທດຢ້ຽມຢາມ ພື້ນຖານການຜະລິດ ເມືອງຫາດຊາຍຟອງ

ທ່ານ ບຸນ​ຍັງ ວໍລະ​ຈິດ ປະທານ​ປະເທດ​ ແຫ່ງ ສປປ ລາວ, ພ້ອມ​ດ້ວຍ​ຄະນະ ​ຢ້ຽມຢາມ ແລະ ຊຸກຍູ້​ການ​ຜະລິດ​ ຢູ່​ເມືອງ​ຫາດຊາຍ​ຟອງ ນະຄອນຫລວງ​ວຽງ​ຈັນ

ຂປລ. ທ່ານ ບຸນ​ຍັງ ວໍລະ​ຈິດ ປະທານ​ປະເທດ​ ແຫ່ງ ສປປ ລາວ, ພ້ອມ​ດ້ວຍ​ຄະນະ ​ຢ້ຽມຢາມ ແລະ ຊຸກຍູ້​ການ​ຜະລິດ​ ຢູ່​ເມືອງ​ຫາດຊາຍ​ຟອງ ນະຄອນຫລວງ​ວຽງ​ຈັນ, ​ໃນວັນ​ທີ 31 ສິງຫາ 2017, ​ໂດຍ​​ມີ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ (ນວ), ພ້ອມດ້ວຍ​ເຈົ້າເມືອງ​ ຫາດ​ຊາຍ​ຟອງ, ບັນດາ​ພະແນກ ແລະ ພາກສ່ວນ​ກ່ຽວຂ້ອງ​ ໃຫ້ການຕອ້ນຮັບ. ການ​ຢ້ຽມຢາມ​ຄັ້ງ​ນີ້, ທ່ານປະທານ​ປະເທດ ໄດ້ລົງ​ເຄື່ອນ​ຢ້ຽມຢາມ ​ເຂດການ​ຜະລິດ​ກະສິກຳ ຂອງ​ປະຊາຊົນ​ຫລາຍ​ຈຸດ​ ໂດຍສະ​ເພາະ ຄອບຄົວຂອງ​ ທ່ານ ສົມ​ມະ​ລັດ ວົງ​ຂຸນ​ສີ ທີ່​ເປັນຄອບຄົວ​ຕົວ​ແບບ​ໃນການ​ປູກ​ເຫັດ​ ທີ່​ນຳ​ໃຊ້​ເຄື່ອງມື​ທັນສະໄໝ ຢູ່​ບ້ານ​ຫາດ​ດອກ​ແກ້ວ, ​ໂດຍເລີ່ມຕົ້ນ​ປູກ​ແຕ່​ປີ 2012 ​ເຊິ່ງໄດ້ລົງທຶນ​ເບື້ອງ​ຕົ້ນ 120 ລ້ານ​ກີບ, ​ໃນ​ນັ້ນ ມີ​ສະຖານ​ທີ່​ປູກ​ເປັນ​ເຮືອນປູກ 5 ​ຫລັງ ສາມາດບັນຈຸ​ເບົ້າ​ເຊື້ອ​ເຫັດ 10.000 ຖົງ​ຕໍ່​ຫລັງ, ​ປູກ​ຊຸດ​ໜຶ່ງ​ສາມາດ​ເກັບ​ໄດ້ 4 ເດືອນ, ຜົນ​ຜະລິດ​ 20-30 ກິ​ໂລ​ຕໍ່​ຄັ້ງຕໍ່​ຫລັງ, ​ລູກ​ຄ້າສ່ວນ​ໃຫຍ່​​ ແມ່ນ​ລູກ​ຄ້າ​ໜ້າ​ຟາ​ມ​ເຫັດ ຫລື ລູກ​ຄ້າມາຊື້​ກັບ​ທີ່​ ລາຄາ 25.000 ກີບ​ຕໍ່ກິ​ໂລ. ນອກ​ນີ້ຍັງ​ໄດ້​ລົງທຶນ​ ປູກໝາກ​ນາວ 17 ລ້ານ​ກີບ, ນັບ​ແຕ່​ປີ 2013 ເປັນຕົ້ນ​ມາ ໃນ​ເນື້ອທີ່ໄລ່​ເຄິ່ງ ມີ 190 ຕົ້ນ ປີຜ່ານມາ ເກັບ​ຜົນ​ຜະລິດ​ໄດ້ 2 ໂຕນ​ກວ່າ ຈຳໜ່າຍໃນ​ລາຄາ 3.000-15.000 ກີບຕໍ່​ກິ​​ໂລ (ຂຶ້ນ​ກັບ​ແຕ່​ລະ​ໄລຍະ), ພ້ອມ​​ຈຳໜ່າຍ​ກ້ອນ​ເຊື້ອ​ເຫັດ, ເບ້ຍ​ໝາກ​ນາວ ແລະ ອື່ນໆ ສະເລ່ຍ​ລາຍ​ຮັບ​ 30 ກວ່າ​ລ້ານ​ກີບຕໍ່​ປີ. ທ່ານປະທານ​ປະ​ເທດ ໄດ້​ໄປ​ຢ້ຽມ​ຊົມ​ສູນ​ຈຳໜ່າຍ​ ຜະລິດ​ຕະ​ພັນ ODOP ຂອງ (ນວ) ຢູ່ສວນ​ອິນ​ແປງ, ປັດຈຸບັນ​ ມີ​ຫົວໜ່ວຍ​ທຸລະ​ກິດ ແລະ ຜູ້​ປະກອບການ​ນຳ​ເອົາ​ສິນຄ້າ ODOP ມາ​ວາງ​ຂາຍ 34 ຫົວໜ່ວຍ ໃນ​ນີ້ 7 ຫົວໜ່ວຍ ເປັນ​ຄອບຄົວ​ຕົວແບບ​ຂອງ (ນວ$, 3 ຫົວໜ່ວຍເປັນ​ຂອງ​ ແຂວງ​ຫົວພັນ ແລະ ແຂວງ​ວຽງ​ຈັນ. ພ້ອມ​ນີ້, ຍັງ​ວາງ​ແຜນ​ຈະ​ອະນຸຍາດ ​ໃຫ້ພໍ່​ຄ້າ​-ແມ່​ຄ້າ ນໍາ​ພືດ​ຜັກ​ອິນ​ຊີ ​ເຂົ້າ​ມາ​ວາງ​ຈຳໜ່າຍ ​ໃນ​ໄວໆ​ນີ້​ຕື່ມ​ອີກ. ພາຍຫລັງ​​ຢ້ຽມ​ຊົມ​ສູນ​ຈຳໜ່າຍ​ ຜະລິດ​ຕະ​ພັນ ODOP ທ່ານປະ​ທານ​ປະ​ເທດ ໄດ້​​ພົບ​ປະ​ໂອ້​ລົມ​ ພະນັກງານຫລັກ​ແຫລ່ງ ​ເມືອງ​ຫາດ​ຊາຍ​ຟອງ ຢູ່ທີ່​ຫ້ອງ​ວ່າການ​ ປົກຄອງ​ເມືອງ​ດັ່ງກ່າວ. ທ່ານ ບຸນ​ທາມ ພຸດ​ທະ​ວົງສາ ເຈົ້າເມືອງ​ຫາດ​ຊາຍ​ຟອງ ໄດ້ລາຍ​ງານ​​ໃຫ້​ຮັບ​ຊາບວ່າ: ເມືອງ​ຫາດ​ຊາຍຟອງ ມີ​ເນື້ອທີ່ 258 ກິ​ໂລຕາແມັດ, ປະກອບ​ມີ 60 ບ້ານ 1.539 ໜ່ວຍ, 17.349 ຄອບຄົວ, 17.469 ຫລັງຄາ​ເຮືອນ, ພົນ​ລະເມືອງ 97.600 ຄົນ ເມືອງ​ ມີ​ສະຖຽນ​ລະ​ພາບ​ ດ້ານ​ການເມືອງ ມີຄວາມ​ສະຫງົບ ແລະ ເປັນ​ລະບຽບ​ຮຽບ​ຮ້ອຍ​ໂດຍ​ພື້ນຖານ. ທົ່ວເມືອງ ​ມີ​ເນື້ອທີ່​ປູກ​ເຂົ້າ 9.895 ເຮັກຕາ, ຜົນ​ຜະລິດ​ໄດ້ 46.330 ໂຕນ, ສະເລ່ຍ​ຜູ້​ໜຶ່ງ​ໄດ້​ຮັບ​ເຂົ້າເປືອກ 476 ກິ​ໂລ​ຕໍ່​ປີ, ປະຕິ​ຮູບ​ໄຮ່ນາ​ນ້ອຍ​ເປັນ​ໄຮ່ນາ​ໃຫຍ່ໄດ້ 1.000 ເຮັກຕາ, ປົດ​ປ່ອຍ​ແຮງງານ​ຄົນ ​ຫັນ​ມາ​ນຳ​ໃຊ້​ກົນ​ຈັກ 3.500 ຄອບຄົວ, ມີ​ກຸ່ມ​ຜະລິດ​ກະສິ​ກຳ​ອິນ​ຊີ 2 ກຸ່ມ ມີ 15 ຄອບຄົວ, ມີເນື້ອທີ່ 7 ເຮັກຕາ, ກຸ່ມ​ຜະລິດ​ກະສິ​ກຳ​ສະອາດ 3 ກຸ່ມ ມີ 73 ຄອບຄົວ, ເນື້ອທີ່ 29,52 ເຮັກຕາ ມີແຜນ​ຈັດ​ເກັບ​ລາຍ​ຮັບ 18 ຕື້​ກວ່າກີບ . ມາ​ຮອດ​ວັນ​ທີ 30 ສິງຫາ 2017 ປະຕິບັດ​ໄດ້ 9,48 ຕື້​ກີບ, ທົ່ວ​ເມືອງ​ມີ​ສິນຄ້າ ODOP ຈຳນວນ 4 ຫົວໜ່ວຍ ກະກຽມ​ສະເໜີ​ໃໝ່ 2 ຫົວໜ່ວຍ ມີ​ຄອບຄົວຕົວ​ແບບ​ ຂົງເຂດ​ການ​ຄ້າ 27 ຄອບຄົວ ປີ 2017 ມີ 41 ໂຄງການ​ລົງທຶນ ມູນ​ຄ່າ 136,5 ຕື້​ກີບ ແຜນການ​ລົງທຶນ​ຂອງ​ລັດ 7,83 ຕື້​ກີບ. ນອກ​ນີ້ ວຽກ​ງານ​ໂຍທາ​ທິການ ແລະ ຂົນສົ່ງ, ວຽກ​ງານ​ວັດທະນະ​ທຳ-ສັງຄົມ ​ກໍໄດ້​ຮັບ​ການພັດທະນາ​ດີ​ຂຶ້ນ​ເປັນ​ກ້າວໆ ແຕ່​ຂໍ​ໃຫ້​ຂັ້ນເທິງ​ ຊ່ວຍ​ປັບປຸງ​ລະບົບ​ ຄອງ​ຊົນລະ​ປະທານ ແລະ ລະບົບ​ຈັກ​ສູບນ້ຳ, ຊ່ວຍ​ປັບປຸງ​ນິຕິ​ກຳ​ ກ່ຽວ​ກັບການ​ຂົນສົ່ງ​ຫີນ-ຊາຍ ເພາະ​ມີລົດ​ຂະໜາດ​ໃຫຍ່​ ບັນຈຸ​ເກີນ​ຂະໜາດ ເຮັດ​ໃຫ້​ເສັ້ນທາງ​ເປ່​ເພ ຊ່ວຍ​ຊອກ​ຊ່ອງ​ທາງ​ ໃນ​ການ​ແກ້ໄຂ​ບັນຫາ​ຢາ​ເສບ​ຕິດ, ຂີ້ລັກ​ງັດແງະ, ຂໍ້​ຂັດ​ແຍ່ງ​ທາງ​ດ້ານ​ທີ່​ດິນ, ໜີ້​ສິນ​ຄ່າ​ນ້ຳ​ຊົນລະປະທານ ແລະ ອື່ນໆ. ໂອກາດ​ນີ້, ທ່ານ​ປະທານ​ປະເທດ​ ໄດ້​ສະແດງ​ຄວາມ​ຊົມເຊີຍ​ ຕໍ່ການ​ນຳ​ເມືອງ ​ທີ່​ໄດ້​ເອົາໃຈໃສ່​ ຊີ້ນຳ-ນຳພາ ເຮັດ​ໃຫ້​ເມືອງ​ຫາດຊາຍ​ຟອງ​ ມີ​ການ​ພັດທະນາ​ດີ​ສົມຄວນ. ພ້ອມ​ນີ້, ທ່ານ​ຍັງ​ໄດ້​ເນັ້ນ​ໃຫ້ ເມືອງ​ເອົາໃຈໃສ່​ຕື່ມ​ ການ​ແກ້​ໄຂບັນຫາ​ຢາ​ເສບ​ຕິດ ໂດຍ​ເລັ່ງ​ໃສ່ເປົ້າ​ໝາຍ​ຕົ້ນຕໍ ລວມ​ທັງ​ບັນດາ ສະ​ຖາ​ບັນ​ການ​ສຶກ​ສາ ຕັ້ງໜ້າແກ້​ໄຂ​ບັນຫາ​ອຸບັດ​ຕິ​ເຫດ​ ໃຫ້​ນັບມື້​ຫລຸດ​ລົງ, ແກ້​ໄຂ​ຂໍ້​ຂັດ​ແຍ່ງ​ ທາງດ້ານ​ທີ່​ດິນ ໂດຍ​ໃຊ້​ມາດ​ຕະການ ວິທີ​ການ​ທີ່​ເໝາະ​ສົມ. ພ້ອມ​ນີ້, ກໍຕ້ອງ​ເອົາໃຈໃສ່​ແກ້​ໄຂ​ ຄວາມທຸກຍາກ​ຂອງ​ປະຊາຊົນ ໂດຍ​ອີງໃສ່ທ່າແຮງ​ບົ່ມ​ຊ້ອນ​ຂອງ​ເມືອງ ເອົາໃຈ​ໃສ່​ສ້າງ​ຄອບຄົວ​ ຕົວ​ແບບ​ດ້ານ​ຕ່າງໆ ​ໃຫ້​ນັບ​ມື້​ຫລາຍ​ຂຶ້ນ, ໂດຍ​ມີການ​ວາງ​ຄາດໝາຍ​ຢ່າງ​ລະອຽດ ຍົກ​ສູງ​ການ​ປະຕິບັດ​ວຽກ​ງານ ຂອງ​ສູນ​ພັດທະນາ​ກະສິກຳ​ຕ່າງໆ ​ໃຫ້​ມີ​ຄວາມ​ເຂັ້ມແຂງ ເພື່ອ​ເສີມຂະຫຍາຍ​ຄອບຄົວ​ຕົວ​ແບບ ເປັນບ່ອນ​ຝຶກອົບຮົມ​ ປະຊາຊົນ​ ໃຫ້​ມີການ​ຜະລິດ​ ຫລາຍ​ຮູບ​ຫລາຍ​ສີ ຕິດພັນ​ກັບ​ການ​ຊອກ​ ຕະຫລາດ​ພາຍໃນ ແລະ ຕ່າງປະເທດ, ສືບຕໍ່​ຂະຫຍາຍ​ເນື້ອທີ່​ ການ​ຜະລິດ ແລະ ຜົນ​ຜະລິດ​ໃຫ້​ຫລາຍ​ຂຶ້ນ ຮັບປະກັນ ທັງ​ຄຸນະພາບ ແລະ ປະລິມານ ເພື່ອ​ຕອບ​ສະໜອງ ​ຄວາມ​ຕ້ອງການ​ ຂອງ​ຕະຫລາດ​ທີ່​ນັບ​ມື້​ຫລາຍຂຶ້ນ. ສາມາດ​ຮອງ​ຮັບ​ ການ​ແຂ່ງຂັນ​ໃນ​ອະນາຄົດ ແລະ ການ​ປຸງແຕ່ງ​ຜະລິດ​ຕະ​ພັນ ​ກໍ່ໃຫ້​ມີ​ຫລາຍຮູບ​ຫລາຍ​ສີຕາມ​ທິດ​ສີຂຽວ ແລະ ຍືນ​ຍົງ. ທັງ​ນີ້, ເພື່ອ​ເຮັດ​ໃຫ້​ປະຊາຊົນ​ຫລຸດພົ້ນ​ ອອກ​ຈາກ​ຄວາມທຸກຍາກ​ ເທື່ອ​ລະ​ກ້າວ ຕາມ​ແນວທາງ​ນະໂຍບາຍ​ ຂອງ​ພັກ​ວາງ​ໄວ້.

ເນື້ອໃນ: ຂປລ