ໂຮງຮຽນສາມັນ ໃນຂອບເຂດທົ່ວປະເທດ ໄຂສົກຮຽນໃໝ່ ດ້ວຍບັນຍາກາດຟົດຟື້ນ

ບັນດາ​ໂຮງຮຽນ ລະບົບ​ສຶກສາ​​ແຫ່ງ​ຕ່າງໆ ທັງ​ພາກ​ລັດ ​ແລະ ​ເອກະ​ຊົນ ​ໃນ​ຂອບເຂດທົ່ວ​ປະ​ເທດ ກຳນົດ​ເອົາ​ວັນ​ທີ 1 ກັນຍາ 2017 ​ເປັນ​ມື້​​ໄຂສົກຮຽນ​ໃໝ່ ຢ່າງ​ເປັນ​ທາງ​ການ

ຂປລ. ​ສົກຮຽນ​ໃໝ່ 2017-2018 ບັນດາ​ໂຮງຮຽນ ລະບົບ​ສຶກສາ​​ແຫ່ງ​ຕ່າງໆ ທັງ​ພາກ​ລັດ ​ແລະ ​ເອກະ​ຊົນ ​ໃນ​ຂອບເຂດທົ່ວ​ປະ​ເທດ ກຳນົດ​ເອົາ​ວັນ​ທີ 1 ກັນຍາ 2017 ​ເປັນ​ມື້​​ໄຂສົກຮຽນ​ໃໝ່ ຢ່າງ​ເປັນ​ທາງ​ການ, ພ້ອມທັງສະຫລຸບຄືນ ການຈັດຕັ້ງປະຕິບັດ ຕາມແຜນປະຕິຮູບ ການສຶກສາ ແລະ 3 ແຜນງານໃຫຍ່ ທີ່ກະຊວງສຶກສາທິການ ແລະ ກິລາ ນະຄອນຫລວງວຽງຈັນ ວາງອອກ ແລະ ແຜນພັດທະນາ ໂຮງຮຽນຕົວແບບ.

ໃນໂອກາດດັ່ງກ່າວ, ທ່ານ ນາງ ວຽງສຸວັນ ພະໄຊສົມບັດ ຜູ້ອຳນວຍການ ໂຮງຮຽນມັດທະຍົມ​ສົມບູນ​ວຽງຈັນ ໄດ້ລາຍງານບົດສະຫລຸບ ໃນສົກຮຽນ 2016-2017 ແລະ ແຜນພັດທະນາໂຮງຮຽນ ຂອງຕົນ ໃນສົກຮຽນ 2017-2018 ແມ່ນສືບຕໍ່ວຽກງານການພັດທະນາ ໂຮງຮຽນຕົວແບບຄຸນນະພາບ, ສືບຕໍ່ປັບປຸງ ແບບແຜນການຮຽນ, ການສອນໃຫ້ໄດ້ດີກວ່າເກົ່າ ແລະ ສືບຕໍ່ວຽກງານການເຄື່ອນໄຫວ ກິດຈະກຳຕ່າງໆ, ພ້ອມທັງເນັ້ນໃຫ້ບັນດາ ຄູ-ອາຈານ ເອົາໃຈໃສ່ ສຶກສາອົບຮົມແນວຄິດ, ຄຸນສົມບັດ ແລະ ນັກຮຽນໃຫ້ເອົາໃຈໃສ່ຮ່ຳຮຽນ ແນວທາງນະໂຍບາຍ, ມະຕິຄຳສັ່ງຂອງພັກ-ລັດ, ໂດຍສະເພາະ ແມ່ນມະຕິ X ຂອງພັກ, 4 ຄາດໝາຍບຸກທະລຸ, ຂະບວນການແຂ່ງຂັນຮັກຊາດ ແລະ ພັດທະນາ ກໍຄື ມະຕິກອງປະຊຸມໃຫຍ່ ຄັ້ງທີ່ V ຂອງອົງຄະນະພັກ ນະຄອນຫລວງວຽງຈັນ, ເຊື່ອມຊືມຜັນຂະຫຍາຍແກ່ ຄູ-ອາຈານ ແລະ ນັກຮຽນ ໃຫ້ມີຄວາມເຂົ້າໃຈ ແລະ ພ້ອມກັນປະຕິບັດ. ບັນດາຄູ-ອາຈານ ຕ້ອງ​ເອົາໃຈໃສ່ໃນການ ສ້າງແຜນການສິດສອນ, ການແຕ່ງບົດສອນ, ສື່ການສອນ, ຂຶ້ນຫ້ອງ ແລະ ອື່ນໆ, ນອກຈາກນີ້, ກໍຕ້ອງສຶກສາ ອົບຮົມຄຸນສົມບັດ ໃຫ້ແກ່ນັກຮຽນທຸກຊົ່ວໂມງສອນ, ໂດຍສະເພາະ ແມ່ນ​ເນັ້ນໃສ່ ລະບຽບຂອງນັກຮຽນ ແລະ ຢຶດໝັ້ນ​ຕາມ 3 ລັກສະນະ 5 ຫລັກ​ມູນ ​ຂອງ​ການ​ສຶກສາ​ແຫ່ງ​ຊາດ ​ເພື່ອ​ບັນລຸ​ເປົ້າ​ໝາຍ​ ສະຫັດ​ສະ​ວັດ ດ້ານ​ການ​ພັດທະນາ, ​ໃຫ້​ສາມາດ​ເຊື່ອມ​ໂຍງ​ເຂົ້າ​ກັບ​ ລະດັບ​ການ​ສຶກສາ ​ແລະ ກິລາ ຂອງ​ພາກ​ພື້ນ ​ແ​ລະ ສາກົນ. ໃນໂອກາດເປີດສົກຮຽນໃໝ່ນີ້, ນາງ ຈັນສຸດາ ສີປະເສີດ ອາຍຸ 16 ປີ, ນັກຮຽນຊັ້ນ ມ6 ແລະ ນາງ ສຸວິມົນ ໄຊສົມບູນ ອາຍຸ 15 ປີ, ນັກຮຽນຊັ້ນ ມ5 ໄດ້ໃຫ້ສຳພາດ ຕໍ່ສື່ມວນຊົນວ່າ: ຮູ້ສຶກຕື່ນເຕັ້ນ ດີໃຈຫລາຍ​ ໃນ​ມື້​ໄຂ​ສົກຮຽນ​ໃໝ່ນີ້, ສິ່ງ​ສຳຄັນ​ສຳ​ລັບສົກ​ຮຽນ​ໃໝ່​ນີ້, ​ແມ່ນຈະ​ໄດ້​ພ້ອມກັນ ຕັ້ງໃຈຄົ້ນ​ຄວ້າຮ່ຳຮຽນ, ​ໃຫ້​ກາຍເປັນນັກຮຽນຮຽນ​ດີ, ຮຽນ​ເກັ່ງ, ​ມີ​ຄຸນສົມບັດ​ສິນ​ທຳ​ປະຕິວັດ, ເປັນ​ນັກຮຽນ​ທີ່​ດີ​ ຂອງ​ຄູ​ອາ ຈານ, ​ເປັນ​ລູກ​ທີ່​ດີ​ຂອງ​ພໍ່​ແມ່ ​ແລະ ​ເອົາ​ໃຈ​ໃສ່ປະຕິບັດ ຕາມກົດລະບຽບຂອງໂຮງຮຽນ ເຊັ່ນ: ການມາໂຮງຮຽນ ຖືກຕ້ອງ​ຕາມ​ໂມງ​ເວລາ, ລະບຽບການນຸ່ງຖື, ການ​ເຄື່ອ​ນ​ໄຫວກິດຈະກຳ​ ຂອງ​ໂຮ​ງຮຽນ ​ແລະ ອື່ນໆ.

ຂ່າວ+ ພາບ : ກິດຕາ
ເນື້ອໃນ: ຂປລ