ຄະນະຜູ້ແທນ ສປປ ລາວ ສຳເລັດການເຂົ້າຮ່ວມ ກອງປະຊຸມຄັ້ງທີ 7 ຂອງລັດພາຄີ ສົນ ທິສັນຍາເກືອດຫ້າມລະເບີດລູກຫວ່ານ

ບັນດາ​ອົງການ​ເຄື່ອຄ່າ​ຍ ສປຊ ​ແລະ ອົງການ​ຈັດ​ຕັ້ງ​ທີ່​ບໍ່​ສັງກັດ​ລັດຖະບານ ​ເຂົ້າຮ່ວມ​ຫລາຍ​ກວ່າ 100 ຄະນະ. ສຳລັບ​ກອງ​ປະຊຸມ​ຄັ້ງ​ທີ 8 ຂອງ​ລັດ​ພາຄີ​ສົນທິສັນຍາ ​ເກືອດ​ຫ້າມ​ລະ​ເບີດ​ລູກ​ຫວ່ານ ​ແມ່ນ​ປະ​ເທດ​ນີກາ​ລາ​ກົວ ຈະ​ເປັນ​ປະ​ທານ​ໃນ​ຄັ້ງຕໍ່​ໄປ

ໃນ​ລະຫວ່າງ​ວັນ​ທີ 4-6 ກັນຍາ 2017 ທີ່​ຫ້ອງການອົງການ​ສະຫະ​ປະຊາ​ຊາດ ທີ່​ນະຄອນ​ເຊີ​ແນວ, ປະ​ເທດ​ສະ​ວີສ​ເຊີ​ແລນ, ກອງ​ປະຊຸມ​ຄັ້ງທີ 7 ຂອງ​ລັດ​ພາຄີ​ສົນ​ທິສັນຍາ ​ວ່າ​ດ້ວຍ​ການ​ເກືອດ​ຫ້າມ​ລະ​ເບີດ​ລູກ​ຫວ່ານ ​ໄດ້​ຈັດ​ຂຶ້ນພາຍ​ໃຕ້​ການ​ເປັນ​ປະທານ ​ຂອງ​ປະ​​ເທດ​ເຢຍລະ​ມັນ, ​ຊຶ່ງມີ​ຜູ້​ຕາງໜ້າ ​ຈາກ​ບັນດາ​ປະ​ເທດ​ລັດ​ພາຄີ, ປະ​ເທດ​ທີ່​ໄດ້​ລົງ​ນາມ​ ໃນ​ສົນທິສັນຍາ, ປະ​ເທດ​ສັງ​ເກດ​ການ, ບັນດາ​ອົງການ​ເຄື່ອຄ່າ​ຍ ສປຊ ​ແລະ ອົງການ​ຈັດ​ຕັ້ງ​ທີ່​ບໍ່​ສັງກັດ​ລັດຖະບານ ​ເຂົ້າຮ່ວມ​ຫລາຍ​ກວ່າ 100 ຄະນະ. ສຳລັບ​ກອງ​ປະຊຸມ​ຄັ້ງ​ທີ 8 ຂອງ​ລັດ​ພາຄີ​ສົນທິສັນຍາ ​ເກືອດ​ຫ້າມ​ລະ​ເບີດ​ລູກ​ຫວ່ານ ​ແມ່ນ​ປະ​ເທດ​ນີກາ​ລາ​ກົວ ຈະ​ເປັນ​ປະ​ທານ​ໃນ​ຄັ້ງຕໍ່​ໄປ. ຄະນະ​ຜູ້​ແທນ​ຂອງ ສປປ ລາວ ນຳ​ໂດຍ​ທ່ານ ​ຫົວໜ້າ​ອົງການ​ຈັດ​ຕັ້ງ​ສາກົນ, ກະຊວງ​ການ​ຕ່າງປະ​ເທດ ​ແລະ ຄະນະ​ປະກອບ​ດ້ວຍ​ທ່ານ ຜູ້ອຳ​ນວຍ​ການ​ຄະນະ​ກຳມະການ​ແຫ່ງ​ຊາດ ​ເພື່ອ​ການ​ແກ້​ໄຂ​ບັນ ຫາ​ລະ​ເບີດ​ບໍ່​ທັນ​ແຕກ (ຄຊກລ) ​ແລະ ຫົວໜ້າ​ໂຄງການ​ເກັບ​ກູ້​ລະ​ເບີດ​ແຫ່ງ​ຊາດ (ຄກລ) ​ໄດ້​ເຂົ້າຮ່ວມ ແລະ ຜັດປ່ຽນ​ກັນ ປະກອບ​ຄຳ​ເຫັນ​ຢ່າງ​ຕັ້ງໜ້າ ​ໃນ​ຫົວ​ຂໍ້​ຕ່າງໆ ທີ່ ສປປ ລາວ ຖື​ເປັນ​ບູລິ​ມະ​ສິດ ​ເປັນ​ຕົ້ນ​ແມ່ນ​ການ​ເຮັດ​ໃຫ້ ​ສົນທິສັນຍາ​ດັ່ງກ່າວ, ຖືກ​ບັງຄັບ​ໃຊ້​ໃນ​ລະດັບ​ສາກົນ, ການ​ກວດ​ກູ້-ທຳລາຍ​ລະ​ເບີດ​ລູດຫວ່ານ, ສຶກສາການຫລຸດຜ່ອນຄວາມສ່ຽງ, ການຊ່ວຍເຫລືອ ຜູ້ເຄາະຮ້າຍ, ການຮ່ວມມື ແລະ ຊ່ວຍເຫລືອ ຂອງສາກົນ ແລະ ການຈັດຕັ້ງ ປະຕິບັດສົນທິສັນຍາ ໃນລະດັບປະເທດ. ໃນໂອກາດກອງປະຊຸມຄັ້ງນີ້, ຄະນະຜູ້ແທນ ສປປ ລາວ ຮ່ວມກັບອົງການ ສປຊ ເພື່ອການພັດທະນາ ແລະ ສະຫະພາບເອີຣົບ ຍັງໄດ້ຮ່ວມຈັດກອງປະຊຸມ ສະເພາະແບບບໍ່ເປັນທາງການ (side event) ໃນຫົວຂໍ້ “ບັນຫາລະເບີດບໍ່ທັນແຕກໃນ ສປປ ລາວ” (The Story of Unexploded Ordnance in the Lao PDR) ເພື່ອແຈ້ງຄວາມຄືບໜ້າ ຂອງການຈັດຕັ້ງປະຕິບັດພັນທະຂອງຕົນ ພາຍໃຕ້ສົນທິສັນຍາ ດັ່ງກ່າວ ໃນຖານະເປັນປະເທດພາຄີ ແລະ ເປັນໜຶ່ງໃນບັນດາປະເທດ ທີ່ໄດ້ຮັບຜົນກະທົບຫລາຍກວ່າໝູ່ ຈາກລະເບີດລູກຫວ່ານ ໂດຍສະເພາະບັນຫາລະເບີດ ຍັງບໍ່ທັນແຕກຕົກຄ້າງ ທີ່ຍັງສືບຕໍ່ສ້າງຜົນກະທົບຮ້າຍແຮງ ແລະ ເປັນອຸປະສັກກີດຂວາງ ການພັດທະນາຢູ່ ສປປ ລາວ. ສປປ ລາວ ຮຽກຮ້ອງໃຫ້ສາກົນ ​ເພີ່ມທະວີການຮ່ວມມື ແລະ ຊ່ວຍເຫລືອແກ່ບັນດາປະເທດ ທີ່ໄດ້ຮັບຜົນກະທົບ ໃນຄວາມພະຍາຍາມດັ່ງກ່າວ, ຊຶ່ງໄດ້ຮັບຄວາມສົນໃຈຈາກ ບັນດາປະເທດລັດພາຄີ, ປະເທດຜູ້ໃຫ້ທຶນ, ປະເທດທີ່ໄດ້ຮັບຜົນກະທົບ ແລະ ອົງການຈັດຕັ້ງສາກົນຕ່າງໆ ເປັນຈໍານວນຫລາຍ. ລັດຖະບານ ສປປ ລາວ ໄດ້ຖືເອົາວຽກງານແກ້ໄຂຜົນກະທົບ ຂອງລະເບີດບໍ່ທັນແຕກ ເປັນບູລິມະສິດແຫ່ງຊາດ, ໂດຍໄດ້ກໍານົດໃຫ້ ວຽກງານແກ້ໄຂບັນຫາລະເບີດບໍ່ທັນແຕກຕົກຄ້າງ ເປັນເປົ້າໝາຍເພື່ອການ ພັດທະນາແບບຍືນຍົງ ແຫ່ງຊາດ ສະເພາະຂອງ ສປປ ລາວ (SDG18) ພາຍໃຕ້ຫົວຂໍ້ “ຊີວິດທີ່ປາສະຈາກລະເບີດບໍ່ທັນແຕກ”. ໃນໂອກາດກອງປະຊຸມລັດພາຄີ ໃນຄັ້ງນີ້, ສປປ ລາວ ໄດ້ຮັບເລືອກໃຫ້ເປັນປະເທດຜູ້ປະສານງານ ໃນວຽກງານກວດກູ້ພາຍໃຕ້ ຂອບການປະຕິບັດສົນທິສັນຍາດັ່ງກ່າວ ໃນສົກປີ 2017 - 2019 ຮ່ວມກັບປະເທດ ເນ​ເທີແລນ. 

ເນື້ອໃນ: ຂປລ