ເມືອງເມິງ ເຝົ້າລະວັງພະຍາດໄຂ້ຍຸງລາຍ

ຂປລ.ຕາມການລາຍງານ ແລະ ຕິດຕາມທ່າອ່ຽງຂອງ ຫ້ອງການສາທາລະນະສຸກ ​ເມື​ອງ​ເມິງ ​ແຂວງ​ບໍ່​ແກ້ວ ໃນວຽກງານເຝົ້າລະວັງ ກໍລະນີພະຍາດໄຂ້ຍຸງລາຍ ແມ່ນອາດ ຈະມີ ການລະບາດແຕ່ຫົວປີ ຄ້າຍຄືປີ 2013. ດັ່ງນັ້ນ ທ່ານເຈົ້າເມືອງໆເມິງ ຈຶ່ງໄດ້ອອກຄໍາສັ່ງ ວ່າດ້ວຍການປ້ອງກັນ ແລະ ສະກັດກັ້ນການລະບາດ ຂອງພະຍາດດັ່ງກ່າວໂດຍເນັ້ນ ໃຫ້ພາກສ່ວນກ່ຽວຂ້ອງ ຈົ່ງເປັນເຈົ້າການຊ່ວຍກັນ ໃນການສະກັດກັ້ນ.

ເພື່ອຮັບປະກັນໃຫ້ແກ່ການຊີ້ນໍາ-ນໍາພາ ແລະ ຈັດຕັ້ງປະຕິບັດວຽກງານ ປ້ອງກັນການລະບາດ ຂອງພະຍາດໄຂ້ຍຸງລາຍ ໃຫ້ມີປະສິດທິຜົນນັ້ນ ເຈົ້າເມືອງໆເມິງ ​ໄດ້ມອບໃຫ້ເລຂາ ຄະນະພັກຮາກຖານ, ເລຂາໜ່ວຍ ພັກ, ນາຍບ້ານທຸກບ້ານພາຍໃນເມືອງ ແລະ ຫົວໜ້າສຸກສາລາ ທີ່ປະຈໍາຢູ່ແຕ່ລະເຂດ ສ້າງແຜນເຮັດຂະບວນການ ອະນາໄມລວມ ທຸກໆອາທິດ. ພ້ອມ​ທັງມອບໃຫ້ຄະນະ ຮັບຜິດຊອບຂັ້ນເມືອງ, ຂັ້ນບ້ານ ຈັດກອງປະຊຸມສະຫລຸບ ຖອດຖອນບົດຮຽນເປັນປະຈໍາ ​ໃນ​ນັ້ນຂັ້ນເມືອງ ໃຫ້ຈັດກອງປະຊຸມ ທຸກໆເດືອນ ແລະ ຂັ້ນບ້ານໃຫ້ຈັດກອງປະຊຸມທຸກໆອາທິດ ເຊິ່ງກອງປະຊຸມແຕ່ລະຄັ້ງ ຕ້ອງມີການສະຫລຸບ ແລະ ວາງທິດທາງແຜນການ ໃນການຈັດຕັ້ງປະຕິບັດເປັນ ແຕ່ລະໄລຍະ.

​
ໂອກາດ​ນີ້, ທ່ານເຈົ້າເມືອງໆເມິງ ຍັງໄດ້ເນັ້ນໜັກໃຫ້ພາກສ່ວນກ່ຽວຂ້ອງເປັນຕົ້ນ ແມ່ນຫ້ອງການສາທາລະນະສຸກ, ຫ້ອງການຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ຫ້ອງການສຶກສາ ທິການ-ກິລາ ແລະ ຫ້ອງການໂຍທາທິການ ແລະ ຂົນສົ່ງ ຊີ້ນໍາຂະແໜງການຂອງຕົນ ອອກແຮງໂຄສະນາ, ຮັກສາອະນາໄມຕາມຄຸ້ມເຮືອນ, ບ້ານ ແລະ ຖະໜົນຫົນທາງ ເພື່ອປ້ອງກັນ ແລະ ສະກັດກັ້ນ ການລະບາດຂອງພະຍາດ ໄຂ້ຍຸງລາຍຕື່ມ​ອີກ.

ເນື້ອໃນ: ຂປລ