ທຸລະກິດຄວາມງາມ ແລະ ການແພດ ມີທ່າອ່ຽງຂະຫຍາຍຕົວສູງໃນລາວ

ທຸລະກິດຄວາມງາມ ແລະ ການແພດ ປັດຈຸບັນ ຖືເປັນທຸລະກິດໜຶ່ງ ທີ່ກຳລັງມາແຮງ ໃນບ້ານເຮົາ ຊຶ່ງສາມາດ ສັງເກດເຫັນໄດ້ ຈາກການເປີດຄຣີນິກ ຂອງນັກທຸລະກິດພາຍໃນ ແລະ ນັກລົງທຶນຕ່າງປະເທດ ເປັນຈຳນວນຫລາຍ, ໂດຍສະເພາະແມ່ນ ຢູນະຄອນຫລວງວຽງຈັນ ເພື່ອໃຫ້ບໍລິການແກ່ປະຊາຊົນລາວ, ພ້ອມທັງເປັນການ ເພີ່ມທາງເລືອກໃຫ້ແກ່ ຜູ້ທີ່ຈະມາໃຊ້ບໍລິການ. Innova Clinic ຖືເປັນຄຣີນິກໜຶ່ງ ຂອງປະເທດເພື່ອນບ້ານ (ປະເທດໄທ) ທີ່ມາເປີດສາຂາຢູ່ນະ ຄອນຫລວງວຽງຈັນ ແລະ ດຳເນີນກິດຈະການ ມາແລ້ວເປັນເວລາ 6 ເດືອນ, ພ້ອມທັງ ມີໂປໂມຊັນສ່ວນຫລຸດ ໃຫ້ແກ່ລູກຄ້າ ທີ່ມາໃຊ້ ຄັ້ງແລກ ຕັ້ງແຕ່ 10-15%. ທ່ານ ນາງ ທັດ​ສະ​ຍາ ສີພາ​ກິດ ຜູ້ອຳນວຍ​ການ Innova Clinic​ ​ໄດ້ໃຫ້​ສຳພາດ​​ ເມື່ອ​ບໍ່​ນານ​ມາ​ນີ້ວ່າ: ການມາເປີດ ຄຣີນິກຢູ່ ສປປ ລາວ ເປັນສາຂາທີ 2, ຊຶ່ງສາຂາທີ 1 ເປີດຢູ່​ ທີ່ຈັງຫວັດພູ​ເກັດ (​ປະ​ເທດ​ໄທ​​) ໂດຍເປັນຄຣີ​ນິກ​ເສີມ​ຄວາມ​ງາມ ບໍລິການດ້ານສັນຍະກໍາ ເພື່ອຕອບ​ສະໜອງ​ ດ້ານ​ຄວາມ​ສວຍງາມ​ຂອງ​ໜຸ່ມ​ສາວ ​ລວມທັງ​ໄວ​ທອງ ນັບ​ທັງໃບ​ໜ້າລົງຮອດ​ແຂນ​ຂາ. ​ຈຸດປະສົງ​ຫລັກ ແມ່ນ​ເຮັດ​ໃຫ້​ໜ້າ​ໃສ, ​ບໍ່​ມີ​ສິວ, ຜີວຂາວ, ຫລຸດ​ນ້ຳ​ໜັກ, ດູດ​ໄຂມັນ, ແລະ ຜ່າຕັດກໍາຈັດ​ສ່ວນ​ເກີນ. ການເປີດ​ສາຂາ​ຢູ່ນະຄອນຫລວງວຽງຈັນ ພຽງ 6 ເດືອນ ເຫັນ​ວ່າ​ສັງຄົມ​ ໄດ້ໃຫ້ການ​ຕອບຮັບ​ທີ່ດີ​, ມີລູກຄ້າປະຈຳ ທີ່ມາໃຊ້ບໍລິການເຖິງ 300-400 ຄົນ, ເນື່ອງຈາກລູກຄ້າ ມີ​​ຄວາມ​ເຊື່ອ​ໝັ້ນ​ຜົນ​ທີ່​ໄດ້​ຮັບ ​ແລະ ພວກເຮົາມີທີມແພດທີ່​ຊ່ຽວຊານ ມາໃຫ້ບໍລິການ, ພ້ອມມີ​ເຄື່ອງມື ທີ່ໄດ້​ມາດຕະຖານ ​ແລະ ປະສົບການ ມາຫລາຍກວ່າ 10 ປີ. ທ່ານ ນາງ ທັດ​ສະ​ຍາ ກ່າວຕື່ມວ່າ: ການດຳເນີນທຸລະກິດ ດ້ານຄວາມງາມ ແລະ ການແພດ ແມ່ນເປັນອາຊີບໜຶ່ງ ທີ່ອາຊຽນກຳນົດເປີດເສລີ ແລະ ພາຍຫລັງເປີດປະຊາຄົມ ເສດຖະກິດອາຊຽນ ແລ້ວ ເຫັນວ່າ ມີຄວາມສະດວກຫລາຍຂຶ້ນ ເຮັດໃຫ້ພວກເຮົາໄດ້ມີໂອກາດ ​ໄດ້ເຮັດວຽກຮ່ວມກັບ ປະເທດເພື່ອນບ້ານ ກວ້າງຂວາງຫລາຍຂຶ້ນ ​ແລະ ໂອກາດຕະຫລາດທາງການແພດ ໂດຍສະເພາະ ທຸລະກິດຄວາມງາມໃນ ສປປ ລາວ ຈະມີທ່າອ່ຽງ ຂະຫຍາຍຕົວຂຶ້ນເລື້ອຍໆ ເນື່ອງຈາກຄົນລຸ້ນໃໝ່ ມັກຄວາມສວຍງາມ, ຢາກເພີ່ມຄວາມໝັ້ນໃຈ ໃຫ້ກັບຕົວເອງຫລາຍຂຶ້ນ, ເສດຖະກິດປະຊາຊົນ ມີລາຍຮັບສູງຂຶ້ນ ແລະ ຍອມຈ່າຍ​ເງິນເພື່ອເພີ່ມຄວາມສວຍງາມ ໃຫ້ແກ່ຕົນເອງຢ່າງແນ່ນອນ. 

 ຂ່າວ: ສັນຕິ ເນື້ອໃນ: ຂປລ