ນາຍົກລັດຖະມົນຕີ ລົງຊຸກຍູ້ການຜະລິດ ຢູ່ແຂວງເຊກອງ-ສາລະວັນ

ຂປລ. ວັນທີ 20-22 ສິງຫາ ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ​ໄດ້ລົງ​ເຄື່ອນ​ໄຫວພົບ​ປະຢ້ຽມຢາມ ແລະ ຊຸກຍູ້ການພະລິດ ຢູ່ແຂວງເຊ​ກອງ​ ແລະ ​ແຂວ​ງສາລະວັນ​ ໂດຍມີ​ການ​ນຳ ​ແລະ ພະນັກງານການນໍາ ຫລັກແຫລ່ງ ຂອງທັງ​ສອງ​ແຂວງ ​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ.

ຢູ່​ແຂວງ​ເຊ​ກອງ, ທ່ານນາຍົກລັດຖະມົນຕີທອງລຸນ ສີສຸລິດໄດ້ໃຫ້ກຽດພົບປະແລະໂອ້ລົມພະນັກງານ ການນຳ, ພະນັກງານຫລັກແຫລ່ງຂອງແຂວງໂດຍ​ໄດ້​ຮັບ​ຊາບ​ສະພາບລວມ ການພັດທະນາ ເສດຖະກິດ-ສັງຄົມ ຂອງແຂວງເຊກອງ ໃນໄລຍະຜ່ານມາຈາກທ່ານຄຳເຜີຍບຸດດາວຽງ ເຈົ້າແຂວງໆເຊກອງ​ເຊິ່ງລະບຸວ່າ: ໃນ6 ເດືອນຕົ້ນປີ2017 ລວມຍອດຜະລິດຕະພັນ ພາຍໃນGDP ທົ່ວແຂວງ ເຕີບໂຕສະເລ່ຍ9,1% ລາຍຮັບສະເລ່ຍໃສ່ຫົວຄົນບັນລຸ1.660 ໂດລາສະຫະລັດ ຕໍ່ຄົນຕໍ່ປີ, ການຈັດເກັບລາຍຮັບ ເຂົ້າງົບປະມານ(ລາຍຮັບພາຍໃນແຂວງ) ສາມາດປະຕິບັດ ໄດ້ທັງໝົດ33,17 ຕື້ກີບ, ທຽບໃສ່ແຜນປີເທົ່າກັບ48,08% ແລະທຽບໃສ່ໄລຍະດຽວ ຂອງປີກ່ອນຫລຸດລົງ2,50%. ຂະນະທີ່ການລົງທຶນຂອງລັດ ສະພາອະນຸມັດໃຫ້ແຂວງ ຈັດຕັ້ງປະຕິບັດທັງໝົດ286 ໂຄງການມູນຄ່າ​ເກືອບ4.000 ຕື້ກີບແລະສະພາອະນຸມັດງົບປະມານ ໃນປີ2017 ມູນຄ່າລວມ198 ຕື້ກວ່າກີບ, ປະຕິບັດໄດ້285ໂຄງການ, ສາມາດຢັ້ງຢືນສະເໜີຂໍເບີກຈ່າຍ(ທຶນພາຍໃນ) 107 ໂຄງການ ມູນຄ່າ77,4 ຕື້ກີບ, ທຽບໃສ່ແຜນເທົ່າກັບ63%.

ຄຽງຄູ່ກັນນັ້ນ,ແຂວງຍັງໄດ້ເອົາໃຈໃສ່ພັດທະນາ ດ້ານວັດທະນະທຳ-ສັງຄົມໃນນີ້ເລັ່ງໃສ່ວຽກງານສຶກສາແລະສາທາເປັນຕົ້ນຕໍແນໃສ່ເພື່ອເຮັດໃຫ້ ຕົວເລກຄາດໝາຍທີ່ກຳນົດໄວ້ໃນ ເປົ້າໝາຍສະຫັດສະວັດ ດ້ານການພັດທະນາ ຂອງປະເທດກໍຄື ຂອງແຂວງ ໃຫ້ບັນລຸຜົນສຳເລັດໂດຍໄວແລະອັນທີ່ພົ້ນເດັ່ນ ໃນປັດຈຸບັນ ແມ່ນການປະຕິບັດວຽກງານ3 ສ້າງກຳລັງດຳເນີນ ໄປຢ່າງເປັນຂະບວນຟົດຟື້ນທັງນີ້ກໍເພື່ອຮັບປະກັນໃຫ້ ປະຊາຊົນບັນດາເຜົ່າ ມີຊີວິດການເປັນຢູ່ທີ່ດີຂຶ້ນ ເທື່ອລະກ້າວ.

ໂອກາດດຽວກັນທ່ານນາຍົກລັດຖະມົນຕີໄດ້ເນັ້ນໃຫ້ແຂວງເອົາໃຈໃສ່ ສຶກສາອົບຮົມການເມືອງ ນຳພາ ແນວຄິດ, ຊຸກຍູ້ສົ່ງເສີມ ການຜະລິດກະສິກຳ(ປູກຝັງ-ລ້ຽງສັດ) ເປັນສິນຄ້າໄປພ້ອມກັບ ການພັດ ທະນາ ພື້ນຖານໂຄງລ່າງດ້ານຕ່າງໆ, ສຸມໃສ່ແກ້ໄຂຈຸດອ່ອນ, ຂໍ້ຄົງຄ້າງແລະສິ່ງທີ່ເປັນອຸປະສັກ ທ້າທາຍຕໍ່ ການພັດທະນາ ເສດຖະກິດ-ສັງຄົມ ຂອງແຂວງໃຫ້ຕົກໄປ, ແກ້ໄຂຄວາມທຸກຍາກ ຂອງປະຊາຊົນ ໃຫ້ຫລຸດໜ້ອຍຖອຍລົງແລະສຳເລັດໂດຍພື້ນຖານໃນປີ2020. ສິ່ງສຳຄັນແຂວງຕ້ອງເອົາໃຈໃສ່ ປະຕິບັດວຽກງານ3 ສ້າງສະໜອງເງື່ອນໄຂ ທີ່ຈຳເປັນ ເຂົ້າໃນການຈັດຕັ້ງປະຕິບັດເພື່ອເຮັດໃຫ້ການສ້າງແຂວງ ເປັນຫົວໜ່ວຍ ຍຸດທະສາດ, ສ້າງເມືອງເປັນ ຫົວໜ່ວຍ ເຂັ້ມແຂງຮອບດ້ານແລະສ້າງບ້ານເປັນຫົວໜ່ວຍ ພັດທະນາ ຢູ່ແຂວງເຊກອງ ປະກົດຜົນເປັນຈິງ ໂດຍໄວຕາມຈຸດປະສົງແລະລະດັບຄາດໝາຍທີ່ ພັກ-ລັດ ວາງອອກ.

ສ່ວນຢູ່​ແຂວງ​ສາລະ​ວັນ, ພາຍຫລັງ ທີ່ທ່ານ ທອງລຸນ ສີສຸລິດ ໄດ້ຮັບຟັງສະພາບ ການພັດທະນາເສດຖະກິດສັງຄົມ ຂອງແຂວງແລ້ວ, ທ່ານ ໄດ້ໂອ້ລົມເນັ້ນໃຫ້ ແຂວງສາລະວັນ ເອົາໃຈໃສຢ່າງເຄັ່ງຄັດ ຕໍ່ກັບບັນຫາ ການຈັດຕັ້ງປະຕິບັດມະຕິ, ຄໍາສັ່ງຂອງພັກ-ລັດຖະບານ ໂດຍສະເພາະ ຄໍາສັ່ງເລກທີ15/ນຍ ວ່າດ້ວຍຫ້າມຂຸດຄົ້ນ ແລະ ສົ່ງອອກວັດຖຸດິບໄມ້ ເພື່ອ​ເປັນ​ການຄືນຄວາມອຸດົມສົມບູນ ຂອງຊັບພະຍາກອນທໍາມະຊາດ ໃຫ້ຍືນຍົງ, ໃຫ້ສືບຕໍ່ການປັບປຸງ ປົວແປງພັກ ໃຫ້ລົງເລິກຮອດຮາກຖານ ປະຊາຊົນຢ່າງໜັກແໜ້ນ, ເອົາໃຈໃສສ້າງພັກ ໃຫ້ມີຄວາມໜັກແໜ້ນເຂັ້ມແຂງ, ໂປ່ງໃສ, ສ້າງຄວາມເຊື່ອໝັ້ນ ແລະ ຈິງໃຈຮັບໃຊ້ປະຊາຊົນ ຢ່າງແທ້ຈິງ, ມີຄວາມເປັນເອກກະພາບ ໃນໝູ່ຄະນະ ພ້ອມກັນ ກໍ່ສ້າງພັດທະນາພື້ນຖານໂຄງລ່າງ, ເສດຖະກິດ-ສັງຄົມ ໃຫ້ມີການຂະຫຍາຍຕົວ ຢ່າງບໍ່ຢຸດຢັ້ງ.ເນື້ອ

ເນື້ອໃນ: ຂປລ