ເປີດບັ້ນການສໍາຫລວດກໍາລັງແຮງງານໃນສປປ ລາວ ຄັ້ງທີ II ປີ 2016

ຂປລ. ຄະນະ​ຊີ້​ນໍາ​ການ​ສໍາ​ຫລວດ​ແຮງ​ງານ ເປີດ​ບັ້ນ​ການ​ສໍາ​ຫລວດ​ກໍາລັງ​ແຮງ​ງານ​ໃນສປປ ລາວ ຄັ້ງ​ທີ II ປີ 2016 ​​ເຊິ່ງຈະ​ໄດ້​ມີ​ການ​ລົງ​ຈັດ​ຕັ້ງ​ປະຕິບັດເກັບ​ກໍາ​ຂໍ້​ມູນ​ໃນ​ທ້າຍ​ປີ​ນີ້ ​ໂດຍຈະ​ມີ​ການ​ສໍາ​ຫລວດ​ຢູ່​ໃນ​ຂອບ​ເຂດ​ທົ່ວ​ປະ​ເທດ ຢູ່​ໃນ 10.800 ກວ່າ​ຄົວ​ເຮືອນ ​ແລະ 540 ບ້ານ.

ທ່ານ ສະ​ໄໝ​ຈັນ ບຸບຜາ ຫົວ​ໜ້າ​ສູນ​ສະຖິຕິ​ແຫ່ງ​ຊາດ, ຫົວ​ຄະນະ​ຊີ້​ນໍາ​ການ​ສໍາ​ຫລວດ​ກໍາລັງ​ແຮງ​ງານ​ຄັ້ງ​ທີ II ປີ 2016 ກ່າວ​ວ່າ: ການ​ສໍາ​ຫລວດ​ກໍາລັງ​ແຮງ​ງານ​ຄັ້ງ​ນີ້ ​ແມ່ນ​ມີ​ຄວາມ​ຈໍາ​ເປັນ ​ແລະ ມີ​ຄວາມ​ສໍາຄັນ​ ໃນ​ການ​ສະໜອງ​ຂໍ້​ມູນ​ສະຖິຕິ​ດ້ານ​ແຮງ​ງານ ​ໃນ​ການວາງ​ແຜນ​ນະ​ໂຍບາຍ ​ແລະ ສ້າງ​ແຜນ​ກໍາ​ນົດຫລັກການ, ລະບຽບ​ການ ​ແລະ ມາດ​ຕະການ​ຄຸ້​ມຄອງ​ແຮງ​ງານ, ການ​ພັດທະນາ​ສີມື​ແຮງ​ງານ, ການ​ສ້າ​ງ​ວຽກ​ເຮັດ​ງານ​ທໍາ ​ແລະ ການ​ນໍາ​ໃຊ້​ແຮງ​ງານ ​ເພື່ອ​ດັດສົມ​ສາຍ​ພົວພັນ​ກໍາລັງ​ແຮງ​ງານ​ກັບ​ການ​ຜະລິດ, ຍົກ​ສູງ​ຄຸນນະພາບ​ຜະລິດ​ຕະພັນ​ໃນ​ທົ່ວ​ສັງຄົມ ​ແລະ ຕິດຕາມຄວາມ​ຄືບ​ໜ້າ​ໃນ​ການຈັດ​ຕັ້ງ​ປະຕິບັດ​ເປົ້າ​ໝາຍ​ສະຫັດ​ສະວັດ​ແຫ່ງ​ການ​ພັດທະນາ MDGs. ​ໃນ​ນັ້ນ, ກໍ​ເພື່ອ​ເປັ​ນການ​ປະຕິບັດ​ກົດໝາຍວ່າ​ດ້ວຍ​ສະຖິຕິ ​ແລະ ຍຸດ​ທະ​ສາດ​ການ​ພັດທະນາ​ລະບົບ​ສະຖິຕິ​ແຫ່ງ​ຊາດ 2010-2020 ​ໃນ​ການ​ສໍາ​ຫລວດ​ໃນ​ທຸກໆ 5 ປີ.

ກອງ​ປະຊຸມ​ດັ່ງກ່າວ, ​ໄດ້​ຈັດ​ຂຶ້ນ​ໃນ​ວັນ​ທີ 18 ຕຸລາ​ ນີ້​, ທີ່ນະຄອນຫລວງ​ວຽງ​ຈັນ​ ໂດຍມີ​ທ່ານ ບຸນ​ຄົງ ຫລ້າ​ສຸ​ກັນ ຮອງ​ລັດຖະມົນຕີ​ກະຊວງ​ແຮງ​ງານ ​ແລະ ສະຫວັດດີ​ການ-ສັງຄົມ, ຮອງ​ຄະນະ​ຊີ້​ນໍາ​ການ​ສໍາ​ຫລວດ​ກໍາລັງ​ແຮງ​ງານ​ຄັ້ງ​ທີ II ປີ 2016, ມີ​ບັນດາ​ຜູ້ຕາງໜ້າ​​ແຕ່ລະກະຊວງ, ​ອົງການ​ຈັດ​ຕັ້ງ​ສາກົນ, ພ້ອມ​ດ້ວຍພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.



ທີ່ມາ: KPL