ກຽມຈັດງານສັບປະດາສິນຄ້າຖິ່ນກໍາເນີດ ຢູ່ນະ ຄອນຫລວງວຽງຈັນ
ທ່ານນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາ ແຈ້ງໃຫ້ຮູ້ວ່າ: ການຈັດງານຖິ່ນກໍາເນີດໃນຄັ້ງນີ້ຈະໄດ້ຈັດຂຶ້ນ ລະຫວ່າງ ວັນທີ 25-28 ຕຸລາ 2016 ນີ້ ຢູ່ທີ່ນະຄອນຫລວງວຽງຈັນ ເຊິ່ງຈະມີການວາງສະແດງສິນຄ້າຖິ່ນກໍາເນີດ ລະດັບພາກພື້ນທີ່ມາຈາກ ສປປ ລາວ, ຫວຽດນາມ, ກໍາປູເຈຍ ແລະ ໄທ ແລະ ບັນດາປະເທດຕ່າງໆອີກຈໍານວນໜຶ່ງໃນອາຊີ ແລະ ເອີຮົບ, ພ້ອມກັບມີການຈັດຫລາຍກິດຈະກໍາ ໂດຍໂຄສະນາເຜີຍແຜ່ແນໃສ່ເຮັດໃຫ້ສັງຄົມມີຄວາມຮັບຮູ້ ແລະ ເຂົ້າໃຈ ກ່ຽວກັບສິນຄ້າຖິ່ນກໍາເນີດຫລາຍຂຶ້ນ ລວມທັງເປັນການເປີດໂອກາດໃຫ້ມີການໂຄສະນາ ເພື່ອເຮັດໃຫ້ສິນຄ້າຖິ່ນກໍາເນີດທັງພາຍໃນ ແລະ ຕ່າງປະເທດ ເປັນທີ່ຮູ້ຈັກໃນສັງຄົມໃຫ້ນັບມື້ນັບຫລາຍຂຶ້ນ.
ທ່ານນາງ ຂັນລາສີ ແກ້ວບຸນພັນ ກ່າວຕື່ມວ່າ: ສິນຄ້າຖິ່ນກໍາເນີດ ແມ່ນສິດທາງດ້ານຊັບສິນທາງປັນຍາ ໃນການປົກປ້ອງຄຸນລັກສະນະສະເພາະຂອງສິນຄ້າ ທີ່ມີຄວາມເຊື່ອມໂຍງກັບຂອບເຂດທາງພູມສາດ ຫລື ຖິ່ນທີ່ມາຂອງສິນຄ້າ. ດັ່ງນັ້ນ, ຈຶ່ງມີການນໍາໃຊ້ຊື່ທາງພູມສາດກັບສິນຄ້າ ເຊັ່ນ: ຊໍາເປນຈາກປະເທດຝຣັ່ງ, ໝາກພິກໄທກໍາປົດ ຈາກກໍາປູເຈຍ, ຊາດາຈີລິງຈາກອິນເດຍ, ຊາມົກເຈົາຈາກ ຫວຽດນາມ, ສະກອດວິດສະກີ ຈາກອັງກິດ, ສ່ວນສິນຄ້າເອກະລັກສະເພາະທີ່ມີຄວາມເຊື່ອມໂຍງກັບຖິ່ນທີ່ມາຂອງ ສປປ ລາວ ລວມມີກາເຟພູພຽງບໍລະເວນ, ເຂົ້າໄກ່ນ້ອຍຈາກ ແຂວງຊຽງຂວາງ ແລະ ຫົວພັນ, ຊາຈາກແຂວງຜົ້ງສາລີ ແລະ ປາກຊ່ອງຜ້າໄໝຈາກ ແຂວງຫລວງພະບາງ ແລະ ຫົວພັນ, ຖິ່ນກໍາເນີດແມ່ນຜົນທີ່ເກີດມາຈາກການເຊື່ອມໂຍງ ລະຫວ່າງສະພາບແວດລ້ອມ ແລະ ພູມປັນຍາຂອງທ້ອງຖິ່ນເຊິ່ງເປັນສິ່ງຄໍ້າປະກັນຕໍ່ຜູ້ບໍລິໂພກ ທີ່ສະແຫວງຫາສິນຄ້າເອກະລັກສະເພາະ, ຄຸນນະພາບສູງ ແລະ ຜ່ານການຮັບຮອງມາດຕະຖານຖິ່ນກໍາເນີດ ຍັງມີຄວາມສໍາຄັນຕໍ່ກັບຜູ້ຜະລິດຢູ່ເຂດຊົນນະບົດ ດ້ວຍການຊ່ວຍເຮັດໃຫ້ມີການຫັນປ່ຽນການຜະລິດທີ່ເນັ້ນໃສ່ປະລິມານ ມາເປັນການຜະລິດທີ່ເນັ້ນໃສ່ຄຸນນະພາບເຊິ່ງຈະເປັນການເພີ່ມໂອກາດທາງການຕະຫລາດ ແລະ ເຮັດໃຫ້ສິນຄ້າມີຄ່າເພີ່ມສູງຂຶ້ນ ໃນຊຸມປີຜ່ານມາສະເພາະຂົງເຂດອາຊີແມ່ນມີຫລາຍກວ່າ 150 ຜະລິດຕະພັນ ທີ່ໄດ້ຮັບການຈົດທະບຽນປົກປ້ອງຖິ່ນກໍາເນີດ.
ທີ່ມາ: KPL
No comments