ອັດຕະປື ຈະສົ່ງນັກກິລາ 7 ປະເພດ ເຂົ້າຮ່ວມງານ ມະຫາກຳກິລານັກຮຽນ ທົ່ວປະເທດ ທີ່ແຂວງ ບໍລິຄຳໄຊ

ຂປລ. ຫວ່າງ​ບໍ່​ດົນ​ມາ​ນີ້, ສະມາຄົມກິລາ ກາຍະກຳ ແຂວງ ອັດຕະປື ໄດ້ເປີດກອງປະຊຸມ ປຶກສາຫາລື, ຄົ້ນຄວ້າ, ກຳນົດ ແລະ ຮັບຮອງເອົາ ປະເພດກິລານັກຮຽນ ຊັ້ນມັດທະຍົມສຶກສາ ເພື່ອເຂົ້າຮ່ວມງານມະຫາກຳ ແຂ່ງຂັນກິລາ ນັກຮຽນ ຊັ້ນມັດທະຍົມສຶກສາ ທົ່ວປະເທດ ຄັ້ງທີ VI ປີ 2017 ທີ່ແຂວງ ບໍລິຄຳໄຊ ເປັນເຈົ້າພາບ ຖັດຈາກ ຄັ້ງທີ V ທີ່ແຂວງ ຈຳປາສັກ ປີ 2014, ຊຶ່ງກອງປະຊຸມ ດັ່ງກ່າວ ໄດ້ຂື້ນທີ່ຫ້ອງວ່າການ ປົກຄອງແຂວງ ພາຍໃຕ້ການ ເປັນປະທານຂອງ ທ່ານ ເລັດ ໄຊຍະພອນ ຮອງເລຂາພັກແຂວງ.

ທ່ານ ເລັດ ໄຊຍະພອນ ໄດ້ໃຫ້ຮູ້ວ່າ: ການເຂົ້າຮ່ວມງານ ແຂ່ງຂັນກິລາ ນັກຮຽນຄັ້ງນີ້ ແມ່ນ ເປັນການ ຊຸກຍູ້ສົ່ງເສີມ ປະກອບສ່ວນເຂົ້າໃນ ແຜນຍຸດທະສາດ ການພັດທະນາກິລາ ກາຍະກຳ ແຕ່ນີ້ເຖິງ 2020 ທີ່ລັດຖະບານ ໄດ້ວາງອອກ ທີ່ສອດຄ່ອງກັບ 3 ລັກສະນະ ແລະ 5 ຫລັກມູນ ຂອງຂະແໜງການ ສຶກສາ ແລະ ສອດຄ່ອງກັບ ແຜນພັດທະນາ ເສດຖະກິດ-ສັງຄົມ ແຫ່ງຊາດ, ຮັບໃຊ້ 2 ໜ້າທີ່ ຍຸດທະສາດ ຄື: ປົກປັກຮັກສາ ແລະ ສ້າງສາງພັດທະນາ ປະເທດຊາດ ແລະ ທັງເປັນການ ຊຸກຍູ້-ສົ່ງເສີມ ແຜນພັດ ທະນາກິລາ ກາຍະກຳແຂວງ ໃນແຕ່ລະທ້ອງຖິ່ນ ໃຫ້ນັບມື້ເຕີບໃຫຍ່ຂະຫຍາຍຕົວ ຢ່າງກ້ວາງຂວາງ ຄຽງຄູ່ກັບປະລິມານ ແລະ ຄຸນນະພາບ ໃຫ້ຄ່ອຍຫຍັບເຂົ້າໃກ້ ທັງພາກພື້ນ ແລະ ສາກົນ ເທື່ອລະກ້າວ ໂດຍເລັງໃສ່ ການພັດທະນາ ກິລານັກຮຽນ ຊັ້ນມັດທະຍົມສຶກສາ ທີ່ເປັນຮຸ້ນສຶບທອດ ໃຫ້ມີການພັດທະນາ ແລະ ເຂັ້ມແຂງຢ່າງຮອບດ້ານ.

ໃນກອງປະຊຸມ ໄດ້ຄົ້ນຄ້ວາ ແລະ ຕົກລົງເຫັນດີ ຮັບຮອງເອົາ ກິລາ 7 ປະເພດ ເຂົ້າຮ່ວມງານແຂ່ງຂັນ ມະຫາກຳກິລາ ນັກຮຽນ ຄັ້ງທີ VI ປີ2017 ທີ່ແຂວງ ບໍລິຄຳໄຊ ຄື: ເຕະບານຊາຍ, ບານສົ່ງ ຮົມ ແລະ ຫາດຊາຍ (ຊາຍ), ເປຕັ້ງຍິງຊາຍ, ໜ້າເກັກຊາຍ, ກະຕໍ້ ຊາຍ, ໝາກເສິກ ຫລື ຈະຕຸລັດເກມ ຊາຍ-ຍິງ ແລະ ແລ່ນລານຊາຍ-ຍິງ ຊຶ່ງປະກອບມີ ແລ່ນ 1500 ແມັດ ແລະ 3000 ແມັດ, ຊຸກນ້ຳ ໜັກ , ຊັດຫລາວ ແລະ ເຕັ້ນຍາວ; ຂະນະທີ່ ງານແຂ່ງຂັນກິລາດັ່ງກ່າວ ຈະຈັດໃຫ້ມີ ທັງໝົດ 11 ປະເພດກິລາ.

ທີ່ມາ: kpl