ລັດຖະບານຍີ່ປຸ່ນ ຊ່ວຍເຫລືອລາວ 40 ຕື້ກວ່າກີບ ເພື່ອນຳ ໃຊ້ເຂົ້າໃນການພັດທະນາເສດຖະກິດ-ສັງຄົມ

ຂປລ. ພິທີ​ລົງ​ນາມ ​ມອບ-​ຮັບ ​ໂຄງການ​ຊ່ວຍ​​ເຫລືອ​ລ້າ ​ໃນ​ການ​ພັດທະນາ​ເສດຖະກິດ-​ສັງຄົມ ຈາກ​ລັດຖະບານ​ຍີ່ປຸ່ນ ມູນ​ຄ່າ 500 ລ້ານ​ເຢັນ ຫລື ປະມານ 40 ຕື້ກວ່າ​ກີບ ລະຫວ່າງ​ທ່ານນາງ ຄຳ​ເພົາ ​ເອີນ​ທະ​ວັນ ຮອງ​ລັດຖະມົນຕີ​ ກະ​ຊວງ​ການ​ຕ່າງປະ​ເທດ ​ແລະ ທ່ານ ຕາ​ເກ​ຊິ ຮິ​ກິ​ຮາຣະ ​ເອກ​ອັກຄະ​ລັດຖະທູດ​ຍີ່ປຸ່ນ ປະຈຳ​ລາວ, ​ໂດຍ​ການ​ເຂົ້າ​ຮ່ວມ​​ເປັນ​ສັກ​ຂີ​ພິຍານ ​​ຈາກ​ພາກສ່ວນ​ທີ່​ກ່ຽວຂ້ອງ​​ສອງ​ຝ່າຍ​ເຂົ້າ​ຮ່ວມ.

​ໂຄງການ​ດັ່ງກ່າວ, ​​ມີ​ຈຸດ​ປະ​ສົງ​ແນ່​ໃສ່​ສະໜັບສະໜູນຄວາມ​ພະຍາຍາມ​ຂອງ ສປປ ລາວ ​ໃນ​ການ​ພັດທະນາ​ເສດຖະກິດ-​ສັງຄົມ ​ແລະ ຫວັງ​ວ່າການ​ສະໜັບສະໜູນ​ໃນຄັ້ງ​ນີ້ ຈະ​ສາມາດ​ສົ່ງ​ເສີມ​ໃຫ້​ລັດຖະບານ​ລາວ ບັນ​ລຸ​ເປົ້າໝາຍ ຕ່າງໆທີ່​ໄດ້​ວາງ​ໄວ້ ​ເປັນ​ຕົ້ນ​ ແມ່ນ​ແຜນ​ພັດທະນາ​ເສດຖະກິດ-​ສັງຄົມ​ແຫ່ງ​ຊາດ 5 ປີ​ຄັ້ງ​ທີ່ 8 ​​ແລະ ຍຸດ​ທະ​ສາດ​ດ້ານ​ການ​ພັດທະນາ​ເສດຖະກິດ-​ສັງຄົມ ​ໂດຍ​ແນ່​ໃສ່​ອຳນວຍ​ຄວາມ​ສະດວກ ​ເພື່ອ​ຫລຸດ​ພົ້ນອອກ​ຈາກ​ປະ​ເທດ​ດ້ອຍ​ພັດທະນາ​ໃນ​ປີ 2020.

ໃນ​ໂອກາດດຽວ​ກັນ​ນີ້, ທ່ານ​ນາງ ຄຳ​ເພົາ ​ເອີນ​ທະ​ວັນ ​ໄດ້​ສະ​ແດງ​ຄວາມ​ຂອບ​ໃຈ ຕໍ່​ລັດຖະບານ​ຍີ່ປຸ່ນ ທີ່​​ສືບ​ຕໍ່​ໃຫ້ການ​ຊ່ວຍ​ເຫລືອ​ແກ່ ສປປ ລາວ ​​ໃນ​ຄັ້ງ​ນີ້, ເຊິ່ງ​ໃນ​ປີ 2015 ຜ່ານ​ມາ ລັດຖະບານ​ຍີ່ປຸ່ນ ​ໄດ້​ໃຫ້ການ​ຊ່ວຍ​ເຫລືອ​ໂຄງການ​ດັ່ງກ່າວ, ​ເພື່ອ​ນຳ​ໃຊ້​​ເຂົ້າ​ໃນ​ການ​ດຸ່ນດ່ຽງງົບ​ປະມານ​ແຫ່ງ​ຊາດ. ​ສຳລັບ​ປີ 2016 ​ໂຄງການ​ຊ່ວຍ​ເຫລືອຈາກ​ລັດຖະບານ​ຍີ່ປຸ່ນ ຈະ​ຖືກ​ນຳ​ໃຊ້​ເພື່ອ​ການ​ດຸ່​ນດ່ຽງງົບ​ປະມານ ​ປີ 2017 ​ເຊັ່ນ​ດຽວກັນ. ການ​ຊ່ວຍ​ເຫລືອ​ດັ່ງກ່າວ, ​ເປັນ​ການ​ປະກອບສ່ວນສຳຄັນ ​​ເຂົ້າ​ໃນ​ການ​ພັດ​ທະນາ​ເສດຖະກິດ-​ສັງຄົມ, ​ໂດຍ​ສະ​ເພາະ ການ​ລົບ​ລ້າງ​ຄວາມທຸກ​ຍາກຂອງ​ປະຊາຊົນ​ບັນດາ​ເຜົ່າ​ເທື່ອ​ລະ​ກ້າວ ​ແລະ ​ເຮັດ​ໃຫ້​ສປປ ລາວ ຫລຸດ​ພົ້ນ​ອອກ​ຈາກ​ປະ​ເທດ​ດ້ອຍ​ພັດທະນາ​ໃນ ປີ 2020


ທີ່ມາ: kpl