ໂຮງຮຽນທ່າແຂກສະຫຼອງວັນຄູແຫ່ງຊາດ ຄົບຮອບ 22 ປີ

ຂປລ. ​ໂຮງຮຽນມັດ​ທະ​ຍົມ​ເມືອງ​ທ່າ​ແຂກ ​ສະຫລອງວັນຄູແຫ່ງຊາດຄົບຮອບ 22 ປີ ໃນວັນທີ 13 ຕຸລາ 2016 ນີ້ຢູ່ທີ່ສະໂມສອນ ໂຮງຮຽນ ມປ ທ່າແຂກ ໂດຍການເປັນກຽດ ເຂົ້າຮ່ວມຂອງທ່ານ ນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະ ກິລາແຂວງ, ທ່ານ ອາຈານ ຄໍາສອນ ຄໍາມູນວົງ ຜູ້ອໍານວຍການໂຮງຮຽນ ມປ ທ່າແຂກ, ມີບັນດາຫົວໜ້າ, ຮອງຫົວໜ້າຂະແໜງ, ພະນັກງານຄູອາຈານ ແລະ ນ້ອງນັກຮຽນ ເຂົ້າຮ່ວມ.

ທ່ານ ຄໍາສອນ ຄໍາມູນວົງ ຜູ້ອໍານວຍການໂຮງຮຽນ ມປ ທ່າແຂກ ​ໄດ້​ກ່າວ​ວ່າ ສົກຮຽນ 2015 – 2016 ແລະ ແຜນພັດທະນາການສຶກສາ ປະຈໍາສົກຮຽນ 2016 -2017 ໄດ້ເອົາໃຈໃສ່ຈັດຕັ້ງປະຕິບັດຢ່າງຕັ້ງໜ້າ ໃນການ ພັດທະນາການສຶກສາ ໂດຍປະຕິບັດຕາມ 3 ແຜນງານໃຫຍ່ກະຊວງສຶກສາທິການ ແລະ ກິລາ ວາງອອກໃຫ້ມີການຂະຫຍາຍດ້ານປະລິມານ ແລະ ຄຸນະພາບຢ່າງຮອບດ້ານ, ດ້ານອາຄານ ມີອາຄານຮຽນ 8 ຫຼັງ ໃນນັ້ນ ອາຄານຮຽນໂຄງການສອນຄອມພິວເຕີຮ່ວມກັບເອກະຊົນ 1 ຫຼັງ, ສູນ ICT 1 ຫລັງ, ຫ້ອງສອນປະຈໍາ 36 ຫ້ອງ, ຫ້ອງມ້ຽນເຄື່ອງທົດລອງ 1 ຫ້ອງ, ຫ້ອງສະໝຸດ 1 ຫ້ອງ, ມີຫ້ອງປະຈໍາການຄູ 9 ຫ້ອງ, ມີຄະນະອໍານວຍການ 4 ທ່ານ, ຍິງ 1 ທ່ານ, ພະນັກງານ ແລະ ລັດຖະກອນຄູທັງໝົດ 98 ທ່ານ, ຍິງ 63 ທ່ານ, ພະນັກງານບໍລິຫານ 3 ທ່ານ, ຄູສອນຊ່ວຍ 11 ທ່ານ, ມີນັກຮຽນທັງໝົດ 1.962 ຄົນ, ຍິງ 1.101 ຄົນ, ການນໍາໃຊ້ຫຼັກສູດການ ແມ່ນສອນຕາມຫຼັກສູດ ຊັ້ນມັດທະຍົມຕອນປາຍ ຂອງກະຊວງສຶກສາທິການ ແລະ ກິລາ, 98% ຂອງວິຊາຮຽນທັງໝົດ ສາມາດສອນໝົດຕາມ ໂຄງການຫຼັກສູດກໍານົດ ແຜນງານພັດທະນາ ການສຶກສາປະຈໍາສົກຮຽນ 2016 2017 ຄາດໝາຍແມ່ນ ການພັດທະນາການສຶກສາ ຕ້ອງຮັບປະກັນ 3 ລັກສະນະຄື: ລັກສະນະຊາດ, ລັກສະນະວິທະສາດທັນສະໄໝ ແລະ ລັກສະນະມະຫາຊົນ, ຕັ້ງໜ້າປະເມີນຜົນ, ປັບປຸງແບບແຜນການຄຸ້ມຄອງພະນັກງານລັດຖະກອນ ກວດກາປະເມີນຜົນ, ເພື່ອໃຫ້ໄດ້ຮັບຜົນສໍາເລັດ ຕາມລະດັບຄາດໝາຍ ພອ້ມນີ້ ທ່ານ ລືໄຊ ສີຫາລາດ ຮອງຜູ້ອໍານວຍໂຮງຮຽນ ມປ ທ່າແຂກ ຍັງ​ໄດ້ເລົ່າປະຫວັດຄວາມເປັນມາຂອງວັນຄູແຫ່ງຊາດ ເຊີ່ງທ່ານໄດ້ຍົກໃຫ້ເຫັນປະຫວັດຄວາມເປັນມາຂອງ ນາຍຄູຄຳ ​ແລະ ໄດ້ມີການມອບໃບຍ້ອງຍໍ ໃຫ້ບັນດາພະນັກງານ ຄູອາຈານຜູ້ທີ່ມີຜົນງານດີເດັ່ນ ໃນໄລຍະຜ່ານມາປະກອບ​ມີ​ ຍ້ອງຍໍ​ຂັ້ນ​ກະຊວງ​ສຶກສາ​ທິການ ​ແລະກິລາ​ຈຳນວນ 60 ທ່ານ, ຍ້ອງຍໍ​ຂັ້ນ​ແຂວງ​ຄຳ​ມ່ວນ​ມີ 24 ທ່ານ ​ແລະ ຍ້ອງຍໍ​ຂັ້ນ​ພະ​ແນ​ກສຶກສາ​ທິການ ​ແລະ ກິລາ 22 ທ່ານ ເປັນກຽດມອບໂດຍທ່ານ ນັນຕະໄຊ ອິນທະສອນ.



ທີ່ມາ: KPL