ວິກິດນ້ຳຖ້ວມໜັກຢູ່ຈີນ-ອິນເດຍ-ປາກິດສະຖານ

ຝົນ­ຕົກລົງມາຢ່າງໜັກເຮັດໃຫ້ນ້ຳຖ້ວມ ແລະ ດິນເຈື່ອນທາງພາກໃຕ້ຂອງສປ ຈີນ ຫຼ້າສຸດມີຜູ້ເສຍຊີ­ວິດແລ້ວ 50 ຄົນສູນ­ຫາຍ 12 ຄົນ, ຂະ­ນະທີ່ອິນເດຍ ແລະ ປາກິດສະ­ຖານກໍຖືກນ້ຳຖ້ວມຢ່າງໜັກ.

 

ຕາມຂ່າວຕ່າງ­ປະ­ເທດລາຍງາຍວ່າ ຝົນທີ່ຕົກ­ລົງມາຢ່າງໜັກ ເຮັດໃຫ້ເກີດນ້ຳຖ້ວມ ແລະ ດິນເຈື່ອນທາງພາກໃຕ້ຂອງຈີນ ໃນໄລ­ຍະ 3 ມື້ທີ່ຜ່ານມາ ຫຼ້າສຸດມີຜູ້ເສຍຊີ­ວິດແລ້ວ 50 ຄົນ ແລະ ສູນ­ຫາຍ 12 ຄົນ ສ່ວນໃຫຍ່ເປັນປະ­ຊາ­ຊົນທີ່­ຢູ່ໃນມົນ­ທົນຫູເປີ່ຍ ແລະ ມົນ­ທົນກຸ້ຍໂຈວ ຊຶ່ງທາງການໄດ້ເລັ່ງອົບພະຍົບປະ­ຊາ­ຊົນອອກຈາກພື້ນທີ່ປະ­ສົບໄພເກືອບ 40 ພັນຄົນ ສ່ວນມົນ­ທົນອັນຮຸຍມີປະ­ຊາ­ຊົນຕິດຢູ່ໃນພື້ນທີ່ນ້ຳຖ້ວມອີກເກືອບ 100 ຄົນ ທາງການຕ້ອງເລັ່ງຊ່ວຍ­ເຫຼືອໂດຍດ່ວນ. ເຈົ້າໜ້າ­ທີ່ອິນເດຍເປີດ­ເຜີຍໃນວັນທີ 3 ກໍ­ລະ­ກົດທີ່ຜ່ານມາວ່າ ຝົນທີ່ຕົກ­ລົງມາຢ່າງໜັກ ແລະ ດິນເຈື່ອນໃນຫຼາຍພື້ນທີ່ຂອງລັດອຸດຕະປະ­ເທດຂອງອິນເດຍໃນທ້າຍອາ­ທິດທີ່ຜ່ານມາ ຢ້ານວ່າຍອດຜູ້ເສຍຊີ­ວິດອາດເພີ່ມຂຶ້ນເປັນຢ່າງໜ້ອຍ 40 ຄົນ.

ຂະ­ນະທີ່ແຂວງໄຄເບີ-ປັກຕຸນຄວາ ທາງພາກເໜືອຂອງປາກິດສະ­ຖານ ກໍປະ­ສົບກັບໄພນ້ຳມຖ້ວມຄັ້ງໃຫຍ່ເຊັ່ນດຽວກັນ ໂດຍຍອດຜູ້ເສຍຊີ­ວິດຫຼ້າສຸດຢູ່ທີ່ 43 ຄົນ, ໄດ້ຮັບບາດ­ເຈັບປະ­ມານ 40 ຄົນ ແລະ ສູນ­ຫາຍເປັນຈຳ­ນວນຫຼາຍ.