ນະຄອນໂຮ່ຈີມິງ ໃຫ້ທຶນຍົກລະດັບວິຊາຊີບແກ່ແມ່ຍິງ
ສະຫະພັນແມ່ຍິງ ນະຄອນຫຼວງວຽງຈັນ ຮ່ວມກັບສະຫະພັນແມ່ຍິງນະຄອນໂຮ່ຈີມິງ ສສ ຫວຽດນາມ ຈັດເຝີກອົບຮົມວິຊາຊີບໃຫ້ແກ່ແມ່ຍິງທຸກຍາກດ້ອຍໂອກາດ ແລະ ບໍ່ມີວຽກເຮັດງານທຳທົ່ວ ນວ ຂຶ້ນວັນທີ 6 ກັນຍາ 2017 ທີ່ສູນເຝີກອົບຮົມວິຊາຊີບ ສະຫະພັນແມ່ຍິງ ນວ ເມືອງຫາດຊາຍຟອງ ມີທ່ານ ບຸນທ່ຽງ ຂຸນສີ ປະທານແນວລາວສ້າງຊາດ ນວ ຜູ້ຊີ້ນຳອົງການຈັດຕັ້ງມະຫາຊົນ ທ່ານນາງ ຄຳໄພ ລັດສະໝີ ປະທານສະຫະພັນແມ່ຍິງ ນວ ທ່ານນາງ ຫງວຽນທິງ໊ອກ ບິກ ປະທານສະຫະພັນແມ່ຍິງ ນະຄອນໂຮ່ຈີມິງ ຄະນະສະຫະພັນແມ່ຍິງ ນວ ນະຄອນໂຮ່ຈີມິງ ແລະ ຄະນະສູນເຂົ້າຮ່ວມ.
ຊຸດອົບຮົມຄັ້ງນີ້ໃຊ້ເວລາ 30 ວັນຈຶ່ງສຳເລັດ ແລະ ສຳມະນາກອນ 45 ຄົນ ຈະໄດ້ຮຽນຮູ້ກ່ຽວກັບວິຊາຊີບການຕັດຫຍິບ ຈັດແຕ່ງຊົງຜົມ ແລະ ການແຕ່ງໜ້າ ໂດຍມີຄູສອນຈາກສູນວັດທະນະທຳແມ່ຍິງ ນະຄອນໂຮ່ຈີມິງ ມາໃຫ້ຄວາມຮູ້ ທັງນີ້ ເພື່ອສົ່ງເສີມສ້າງວຽກເຮັດງານທຳໃຫ້ແມ່ຍິງຜູ້ທີ່ທຸກຍາກ ແລະ ດ້ອຍໂອກາດ ໄດ້ຮັບການຍົກລະດັບວິຊາຊີບ ເຊິ່ງພາຍຫຼັງຮຽນຈົບ ເຂົາເຈົ້າກໍ່ຈະໄດ້ນຳເອົາຄວາມຮູ້ທີ່ໄດ້ມານັ້ນ ໄປປະກອບອາຊີບເພື່ອສ້າງລາຍຮັບໃຫ້ແກ່ຕົນເອງ ແລະ ຄອບຄົວ ເຮັດໃຫ້ຊີວິດການເປັນຢູ່ດີຂຶ້ນເທື່ອລະກ້າວ.
ໂອກາດນີ້ ທ່ານປະທານສະຫະພັນແມ່ຍິງນະຄອນໂຮ່ຈີມິງ ຍັງໄດ້ມອບຄອມພິວເຕີ ຈຳນວນ 18 ຊຸດ ແລະ ຊຸກຍູ້ງົບປະມານ ຈັດເຝີກອົບຮົມຄັ້ງນີ້ ລວມມູນຄ່າທັງໝົດ 772 ລ້ານດົງ ຫຼື ປະມານ 286 ລ້ານກີບ ໃຫ້ແກ່ສູນດັ່ງກ່າວຕື່ມອີກ ເຊິ່ງທ່ານປະທານສະຫະພັນແມ່ຍິງ ນວ ໄດ້ກ່າວສະແດງຄວາມຂອບໃຈມາຍັງແມ່ຍິງນະຄອນໂຮ່ຈີມິງ ທີ່ໄດ້ໃຫ້ການຊ່ວຍເຫຼືອຄັ້ງນີ້ ອັນເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນຮ່ວມມື ທັງເປັນການປະກອບສ່ວນເຂົ້າໃນກິດຈະກຳທີ່ສອງພັກ-ສອງລັດ ແລະ ປະຊາຊົນສອງຊາດ ສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ຢ່າງເປັນຂະບວນຟົດຟື້ນ.
No comments