Article title

ຂປລ. ເມື່ອບໍ່ດົນມານີ້, ບໍລິສັດ ຕຣີເພັດ ອີຊູຊຸເຊວສ໌ ຈຳກັດ ໄດ້ຈັດກິດຈະກຳ ອີຊູຊຸ ຄາລາວານ ທ່ອງທ່ຽວເສັ້ນທາງ 13 ເໜືອນະຄອນຫລວງວຽງຈັນ-ວັງວຽງ ແຂວງວຽງຈັນ ໄລຍະທາງປະມານ 150 ກິໂລແມັດ ເພື່ອຊຸກຍູ້ສົ່ງເສີມການທ່ອງ ທ່ຽວພາຍໃນປະເທດ ໃຫ້ໄດ້ຮັບການພັດທະນາ ທັງເປັນການໂຄສະນາ, ເຜີຍແຜ່ສະຖານທີ່ທ່ອງທ່ຽວ ທາງທຳມະຊາດ ໃຫ້ສັງຄົມທັງພາຍໃນ ແລະ ຕ່າງປະເທດ ໄດ້ຮັບຮູ້ຢ່າງກວ້າງຂວາງ ເຊິ່ງໄດ້ຮັບການຕອບຮັບເປັນຢ່າງດີ ຈາກຜູ້ໃຊ້ລົດອີຊູຊຸ ໂດຍ ມີລົດເຂົ້າຮ່ວມຫລາຍກວ່າ 30 ຄັນ.

ກິດຈະກຳ “ອີຊູຊຸ ຄາລາວານທ່ອງທ່ຽວ” ໃນຄັ້ງນີ້, ນອກຈາກຈະເປັນການຊຸກຍູ້ສົ່ງເສີມການທ່ອງທ່ຽວ ພາຍໃນປະເທດແລ້ວ ຍັງເປັນການຮຽນຮູ້ເຕັກນິກການຂັບລົດ ຢ່າງຖືກຕ້ອງ ທັງໃຫ້ປະຢັດນ້ຳມັນ ແລະ ປອດໄພຍິ່ງຂຶ້ນ ຕາມແບບສະບັບຂອງອີຊູຊຸ. ການຈັດກິດຈະກຳເດີນທາງຈາກ ນະຄອນຫລວງວຽງຈັນ ສູ່ເມືອງວັງວຽງຄັ້ງນີ້, ອີຊູຊຸ ໄດ້ພາລູກຄ້າຄາລາວານໄປທ່ຽວຊົມຖ້ຳຈັງ ເຊິ່ງຖື ວ່າເປັນຖ້ຳທີ່ສວຍງາມແຫ່ງໜຶ່ງ ຂອງເມືອງວັງວຽງ; ນອກນັ້ນ, ຍັງໄດ້ທ່ຽວຊົມຖ້ຳຊ້າງ ກໍເປັນອີກຖ້ຳມະຫັດສະຈັນແຫ່ງໜຶ່ງ ພາຍໃນມີຫີນງອກຫີນຍ້ອຍ ປາກົດເປັນຮູບຊ້າງໃຫ້ເຫັນເດັ່ນຊັດ, ຍັງມີພະພຸດທະຮູບ ແລະ ສິ່ງສັກສິດ ໃຫ້ລູກຄ້າໄດ້ເຂົ້າໄປສັກກາລະ ເພື່ອຄວາມເປັນສີລິມົງຄຸນ ພ້ອມດຽວກັນນັ້ນ, ລູກຄ້າຄາລາວານ ຍັງໄດ້ຮ່ວມກັນແບ່ງປັນຄວາມສຸກມອບສິ່ງຂອງ ໃຫ້ແກ່ນ້ອງໆ ນັກຮຽນໂຮງ ຮຽນຕ່າງໆອີກດ້ວຍ.

ກຸ່ມບໍລິສັດຕຣີເພັດ ໄດ້ເລີ່ມບຸກຕະຫລາດລົດຍົນໃນ ສປປ ລາວ ຄັ້ງທຳອິດ ໃນປີ 2016 ພາຍໃຕ້ນະໂຍບາຍທີ່ເນັ້ນ ສ້າງຄວາມເປັນເລີດ ໃຫ້ກັບແບຣນອີຊູຊຸໃນລາວ ດ້ວຍການຍົກລະດັບມາດຕະຖານ ການດຳເນີນງານຂອງຜູ້ຈຳໜ່າຍອີຊູຊຸ ທັງດ້ານການຂາຍ ແລະ ການບໍລິການ ຫລັງການຂາຍ ການຍົກລະດັບຄວາມຮູ້ ຄວາມສາມາດຂອງບຸກຄະລາກອນ ເຮັດລູກຄ້າໄດ້ຮັບລົດ ທີ່ມີຄຸນນະພາບ ແລະ ຄຸ້ມຄ່າກັບເງິນ./.

ເນື້ອໃນ: ຂປລ