ຮອງນາຍົກລັດຖະມົນຕີ ຕ້ອນຮັບປະທານສະມາຄົມ ນັກທຸລະກິດ ສິງກະໂປ
ຂປລ. ໃນວັນທີ 30 ສິງຫາ 2017 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ເຄີດ ວີ ປະທານສະມາຄົມນັກທຸລະກິດຂະໜ້ອຍ ແລະ ຂະໜາດກາງ ຂອງປະເທດ ສິງກະໂປ, ພ້ອມດ້ວຍຄະນະ ໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ ສປປ ລາວ, ເຊິ່ງນຳພາຄະນະ ໂດຍທ່ານ ໂດມີນິກໂກ ເອກອັກຄະລັດຖະທູດ ສິງກະໂປ ປະຈຳ ສປປ ລາວ.
ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ກໍໄດ້ສະແດງຄວາມຊົມເຊີຍ, ຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ໂດມີນິກໂກ ທີ່ໄດ້ນຳພາຄະນະມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນ ອັນສຳຄັນ ເຂົ້າໃນການເສີມຂະຫຍາຍການພົວພັນຮ່ວມມື ໃນຂະແໜງ ການລົງທຶນເຮັດທຸລະກິດຂອງ ລາວ-ສິງກະໂປ ໃຫ້ໄດ້ຮັບການພັດທະນາ ແລະ ແຕກດອກອອກຜົນງອກງາມຍິ່ງໆຂຶ້ນໃນອະນາຄົດ. ພ້ອມດຽວກັນນີ້, ທ່ານ ໂດມີນິກໂກ ກໍໄດ້ສະແດງຄວາມຂອບອົກຂອບໃຈ ຕໍ່ ທ່ານ ສອນໄຊ ສີພັນດອນ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງຂອງ ການເດີນທາງມາ ສປປ ລາວ ໃນຄັ້ງນີ້ ຂອງຄະນະ ໃຫ້ ທ່ານ ສອນໄຊ ສີພັນດອນ ຊາບຕື່ມອີກ.
ຂ່າວ: ສົມຫວັງ ພາບ: ເກດສະໜາ
ເນື້ອໃນ: ຂປລ
No comments