ແລ່ນມາລາທອນ ລະດົມທຶນຊ່ວຍເຫລືອໂຮງໝໍເດັກ ຢູ່ແຂວງຫລວງພະບາງ

ຂປລ. ກຸ່ມ​ວີ​ລັນ ຈະ​ຈັດ​ກິດຈະກຳ ​ແລ່ນ​ມາລາ​ທອນ ​​ແຕ່ນະຄອນຫລວງ​ວຽງ​ຈັນ ​ເຖິງ ​ແຂວງ​ຫລວງ​ພະ​ບາງ ​ໄລຍະ​ທາງ 385 ກິ​​ໂລ​ແມັດ, ​ໃຊ້​ເວລາ 4 ມື້ ເພື່ອ​ລະດົມ​ທຶນ​ຊ່ວຍ​ເຫລືອ​ໂຮງໝໍ​ເດັກ ​ເພື່ອນ​ລາວ ຢູ່​ແຂວງ​ຫລວງ​ພະບາງ ​ເຊິ່ງຈະ​ເລີ່​ມເດີນທາງ​ ຈາກ​ສວນ​ປະຕູ​ໄຊ ນະຄອນຫລວງ​ວຽງ​ຈັນ ໃນ​ວັນ​ທີ 18-21 ຕຸລານີ້.

​ໃນ​ການ​ແລ່ນມາລາ​ທອນ​ດັ່ງກ່າວ, ມີ​ນັກ​ແລ່ນ​ 4 ຄົນ ນຳ​ໂດຍ ທ່ານ ຄາ​ໂລ ບາ​ຄາ​ລາ ນັກ​ແລ່ນທົນ​ ຊາວ​ຟີ​ລິບ​ປິນ ​ເຊິ່ງ​ໄດ້​​ແບ່ງ​ໄລຍະ​ທາງ​ກັນ​ ຜູ້​ໜຶ່ງ ​ແລ່ນ 55 ກິ​ໂລ​ແມັດ ຕໍ່​ມື້, ມື້ໜຶ່ງ ​ແລ່ນ 2 ຄົນ (ລວມ 110 ກິ​​ໂລ​ແມັດ​ຕໍ່​ມື້) ​ເຊິ່ງທ່ານ ຄາ​ໂລ ບາ​ຄາ​ລາ ຈະ​ໄດ້​ແລ່ນ​ທຸກ​ມື້, ທ່ານ​ນາງ ວຽງ​ດາລາ ສົມ​ເພັດ ຮ່ວມ​ແລ່ນ​ມື້​ທຳ​ອິດ 55 ກິ​ໂລ​ແມັດ, ທ່ານ ​ເດືອນ​ເພັງ ຈິນ​ດາ​ວົງ ​ແລ່ນມື້​ທີສອງ 55 ກິ​ໂລ​ແມັດ, ທ່ານ ຄາ​ເມ​ລອນ ​ເລ ມື້​ທີສາມ 55 ກິ​ໂລ​ແມັດ ​ແລະ ມື້​ທີ່ 4 ທ່ານ ຄາ​ໂລ ບາ​ຄາ​ລາ ​ແລ່ນ​ຄົນ​ດຽວ 55 ກິ​ໂລ​ແມັດ ​ເຖິງ​​ແຂວງ​ຫລວງ​ພະ​ບາງ.

​ກຸ່ມ​ວີ​ລັນ (We Run) ​ເປັນ​ກຸ່ມ​ແລ່ນ ຢູ່​ນະຄອນຫລວງ​ວຽງ​ຈັນ, ທີ່​ເກີດ​ຂຶ້ນ​ທຳ​ອິດ​ຈາກ​ການກະກຽມ ​ແລະ ​ເຂົ້າ​ຮ່ວມ ການ​ແລ່ນ​ລາຍການ​ຫລວງ​ພະ​ບາງ ​ຮາບ​ມາລາ​ທອນ ​ໃນ​ປີຜ່ານມາ. ​ໃນ​ໄລຍະ​ຜ່ານ​ມາ, ກຸ່ມ​ວີ​ລັນ ​ກໍໄດ້​ຈັດ​ກິດຈະກຳດັ່ງກ່າວ, ​ໂດຍທ່ານ ຄາ​ໂລ ບາ​ຄາ​ລາ ນັກ​ແລ່ນ​ທົນ ຊາວ​ຟີ​ລິບ​ປິນ ​ແລ່ນ​ຄົນ​ດຽວ ​ໃຊ້​ເວລາ​ທັງ​ໝົດ 5 ວັນ, ມື້ໜຶ່ງ​ແລ່ນ​ປະມານ 75-80 ກິ​ໂລ​ແມັດ ​ເພື່ອ​ລະດົມ​ທຶນ​ຊ່ວຍ​ເຫລືອ​ໂຮງໝໍ​ດັ່ງກ່າວ, ​ເຊິ່ງ​ໂຮງໝໍ​ນີ້, ​ໄດ້​ເປີດ​ໃຫ້​ບໍລິການ ​​ປິ່ນປົວ​ເດັກນ້ອຍ​ ໂດຍ​ບໍ່​ເສຍ​ຄ່າ​ໃຊ້​ຈ່າຍ​ໃດໆ ​ແຕ່​ຕົ້ນ​ປີ 2015 ​ເປັນ​ຕົ້ນ​ມາ.