ຮອງນາຍົກລັດຖະມົນຕີຮ່ວມສະຫລອງວັນອາຫານໂລກ ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ
ການສະເຫລີມສະຫລອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງລ້າງຄວາມ ທຸກຍາກໃນຄັ້ງນີ້, ແມ່ນມີຄວາມໝາຍຄວາມສໍາຄັນທີ່ສຸດ ແນໃສ່ປູກຈິດສໍານຶກ ແລະ ສ້າງຄວາມຮູ້ໃຫ້ປະຊາຊາດໃນໂລກໄດ້ເຂົ້າໃຈວ່າ ຄວາມທຸກຍາກ ແລະ ໄພອຶດຫິວ ບໍ່ແມ່ນບາບກໍາທີ່ເທວະດາຟ້າແຖນເປັນຜູ້ປັ້ນແຕ່ງໃຫ້ ແຕ່ມັນແມ່ນປະກົດການທາງສັງຄົມໜຶ່ງ ທີ່ສາມາດລຶບລ້າງໃຫ້ໝົດໄປໄດ້; ປົດປ່ອຍປະຊາຊາດໂດຍສະເພາະຜູ້ທຸກຍາກອຶດຫິວ ອອກຈາກວົງຈອນອຸບາດທາງດ້ານແນວຄິດ, ແກ້ໄຂຄວາມຮູ້ສຶກຕໍ່າຕ້ອຍ-ຕີຕົວຕໍ່າ, ຄວາມໂງ່ຈ້າຫລ້າຫລັງ ແລະ ການເຊື່ອຖືງົມງວາຍ, ໃຫ້ເຂົ້າເຈົ້າຮູ້ສຶກວ່າຕົນເອງມີກຽດສັກສີ ຂອງຄວາມເປັນມະນຸດ, ມີເຫື່ອແຮງສະຕິປັນຍາຄືຄົນທົ່ວໄປ, ຈາກນັ້ນ ແມ່ນໃຫ້ເຂົາເຈົ້າມີກໍາລັງໃຈ, ມີຄວາມກ້າຫານ ແລະ ມີຄວາມສາມາດບືນຕົວອອກຈາກຄວາມທຸກຍາກ ແລະ ໄພອຶດຫິວໄດ້. ເຊິ່ງການສະເຫລີມສະຫລອງສອງວັນດັ່ງກ່າວ, ແມ່ນຢູ່ໃນເງື່ອນໄຂທີ່ວົງສາຄະນະຍາດສາກົນລວມທັງສປປ ລາວ ໄດ້ຮັບຮອງເອົາເປົ້າໝາຍການພັດທະນາແບບຍືນຍົງ (SDG) ທີ່ຖືເອົາການລຶບລ້າງຄວາມທຸກຍາກ ແລະ ໄພອຶດຫິວ ເປັນບູລິມະສິດອັນດັບໜຶ່ງ ເຊິ່ງໄດ້ສະແດງອອກຢູ່ໃນ SDG 1 ທີ່ວ່າ:“ລຶບລ້າງຄວາມທຸກຍາກທຸກຮູບແບບ ໃນທົ່ວໂລກ”ແລະ SDG 2 ທີ່ວ່າ: “ລຶບລ້າງຄວາມອຶດຫິວ, ບັນລຸການຄໍ້າປະກັນສະບຽບອາຫານ ແລະ ປັບປຸງດ້ານໂພຊະນາການ ແລະ ສົ່ງເສີມການກະສິກໍາແບບຍືນຍົງ”.
ເພື່ອເຮັດໃຫ້ພິທີສະເຫລີມສະຫລອງສອງວັນສາກົນດັ່ງກ່າວ, ມີຄວາມໝາຍຄວາມສໍາຄັນຍິ່ງຂຶ້ນນັ້ນ ທ່ານຮອງນາຍົກລັດຖະມົນຕີ ຍັງໄດ້ໃຫ້ກຽດເຂົ້າຮ່ວມພິທີຍ່າງມາລາທອນ ໂດຍເລີ່ມຈາກຫ້ອງວ່າການປົກຄອງແຂວງ ຫາສະໜາມຫລວງຂອງແຂວງ, ຈາກນັ້ນ, ກໍ່ໄດ້ເປີດພິທີສະເຫລີມສະຫລອງສອງວັນດັ່ງກ່າວ ຢ່າງເປັນການ. ເຊິ່ງໃນພິທີໄດ້ມີການວາງສະແດງສິນຄ້າ, ຜະລິດຕະພັນຕ່າງໆ, ຜົນຜະລິດກະສິກໍາ, ຫັດຖະກໍາຈາກບັນດາຂະແໜງ ການຕ່າງໆ ແລະ ປະຊາຊົນແຂວງໄຊຍະບູລີ. ຈາກນັ້ນ, ທ່ານ ຮອງນາຍົກລັດຖະມົນຕີພ້ອມດ້ວຍຄະນະ ຍັງໄດ້ເດີນທາງໄປເຄື່ອນໄຫວຢ້ຽມຢາມ ໂຮງໄຟຟ້າພະລັງງານຄວາມຮ້ອນຫົງສາ, ເຊິ່ງໂຄງການດັ່ງກ່າວໄດ້ເລີ່ມດໍາເນີນການກໍ່ສ້າງ ໃນ ປີ 2010 ແລະ ສໍາເລັດການກໍ່ສ້າງໃນຕົ້ນປີ 2016, ມີກໍາລັງການຜະລິດທັງໝົດ 1778 ເມກາວັດ, ມີພະນັກງານ 4.000 ກວ່າຄົນ, ກະແສໄຟຟ້າທີ່ຜະລິດໄດ້ສ່ວນໃຫຍ່ ແມ່ນສົ່ງອອກຂາຍໄປປະເທດໄທ.
ໃນໂອກາດເດີນທາງມາເຄື່ອນໄຫວວຽກງານຄັ້ງນີ້, ທ່ານ ຮອງນາຍົກລັດຖະມົນຕີ ໄດ້ມອບເງິນ ຈໍານວນ 200 ລ້ານກີບ ເພື່ອຊ່ວຍເຫລືອຜູ້ປະສົບໄພພິບັດທາງທໍາມະຊາດ ແລະ ແກ້ໄຂຄວາມທຸກຍາກຂອງປະຊາຊົນໃນ 4 ເມືອງຂອງແຂວງຫລວງພະບາງ ຄື: ເມືອງນານ, ເມືອງຈອມເພັດ, ເມືອງຊຽງເງິນ ແລະ ເມືອງໂພນໄຊ.
No comments