ເຊີນເຂົ້າຮ່ວມພິທີຫຼອມຄຳໂອບຍອດພະທາດຫຼວງ

ເພື່ອ​ກຽມ​ຄວາມ​ພ້ອມ​ໃຫ້ແກ່​ງານ​ສະເຫຼີມສະຫຼອງ ​ການ​ກໍ່ສ້າງ​ພະ​ທາດຫຼວງ​ວຽງ​ຈັນ ຄົບຮອບ 450 ປີ ທີ່​ຈະ​ຈັດ​ຂຶ້ນ​ລະຫວ່າງ​ວັນ​ທີ 12-14 ພະຈິກ 2016 ນີ້ ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ກໍ່​ຄືອົງການ​ປົກຄອງ​ນະຄອນຫຼວງ​ວຽງຈັນ ແລະ ພາກສ່ວນ​ທີ່​ກ່ຽວຂ້ອງ ຈະ​ໄດ້​ຈັດ​ພິທີ​ຫຼອມ​ຄຳ ທີ່​ໄດ້​ຮັບການ​ສົມທົບ​ທຶນ​ຈາກ​ບຸກຄົນ ນິຕິບຸກຄົນ ອົງ​ການຈັດຕັ້ງທັງ​ພາຍໃນ ແລະ ຕ່າງປະເທດ ກະກຽມໂອບ​ຍອດ​ພະ​ທາດຫຼວງ ໃນ​ວັນ​ທີ 2 ຕຸລາ 2016 ກົງ​ກັບ​ວັນ​ອາທິດ ຂຶ້ນ 1 ຄ່ຳ ເດືອນ 11 ​ພສ 2559 ເວລາ 14:00 ໂມງ​ເປັນຕົ້ນ​ໄປ ທີ່ເດີ່ນ​ກົມ​ມະ​ລຽນ​ພະ​ທາດຫຼວງ.

ສະນັ້ນ ຂໍ​ເຊີນຊວນ​ພໍ່​ແມ່​ປະຊາ​ຊົນ ພໍ່ຄ້າ​ຊາວ​ຂາຍ ບຸກຄົນ ນິຕິບຸກຄົນ ອົງ​ການຈັດຕັ້ງ​ພັກ-ລັດ ຕະຫຼອດ​ຮອດ​ຫົວໜ່ວຍ​ທຸລະກິດ​ທັງ​ພາຍ​ໃນ ແລະ ຕ່າງ​ປະເທດ ​ຜູ້​ທີ່​ມີ​ຈິດໃຈ​ເຫຼື້ອມ​ໃສ​ສັດທາ ເຂົ້າ​ຮ່ວມ​ພິທີ​ດັ່ງກ່າວ​ ໃຫ້​ເປັນ​ຂະບວນ​ຟົດຟື້ນ ຫຼື ທ່ານ​ໃດ​ຢາກ​ປະກອບ​ສ່ວນ​ສົມທົບ​ທຶນ ​ກໍ່​ສາມາດປະກອບ​ໄດ້.