ອາຫານເຈ ທີ່ໃຫ້ທາດໂປຕີນສູງ
ໃນຄໍລຳພວກເຮົາ ເຄີຍໄດ້ນຳສະເໜີ ໄປແລ້ວກ່ຽວກັບ ວິທີກິນອາຫານເຈ ໃຫ້ຖືກວິທີ ແລະ ບໍ່ໃຫ້ຂາດສານອາຫານ ເພື່ອສືບຕໍ່ ຈາກບົດຜ່ານມາ ມື້ນີ້ພວກເຮົາ ຂໍນຳສະເໜີ ຂໍ້ມູນກ່ຽວກັບອາຈານເຈ ທີ່ມີໂປຕີນສູງ. ຫລາຍຄົນຄິດວ່າ ທາດໂປຕີນ ແມ່ນມີຢູ່ນຳ ຊີ້ນສັດເທົ່ານັ້ນ ແຕ່ຄວາມຈິງແລ້ວ ພືດຜັກບາງຊະນິດ ກໍມີທາດໂປຕີນສູງ ເຊັ່ນກັນເຊັ່ນ: ໝາກຖົ່ວ ບໍ່ວ່າຈະເປັນ ຖົ່ວປະເພດໃດ ກໍໃຫ້ໂປຕີນສູງ ແລະ ຍັງນໍາມາປະກອບ ອາຫານໄດ້ຫລາຍ ປະເພດບໍ່ວ່າ ຈະຖົ່ວລັນເຕົາຜັດ, ແກງສົມໃສ່ ໝາກຖົ່ວຍາວ, ຕົ້ມຖົ່ວຂຽວ ຫລື ຈະເປັນຖົ່ວດິນ ອົບແຫ້ງ, ຖົ່ວ ປາກອ້າອົບເກືອ ແລະ ອື່ນໆ. ເຫັດ ບໍ່ວ່າຈະເປັນ ເຫັດຫອມ, ເຫັດເຟືອງ, ເຫັດນາງຟ້າ, ເຫັດຫູໜູ, ເຫັດນາງລົມ ແລະ ອື່ນໆ ແມ່ນມີໂປຕີນ ສູງກວ່າພຶດ ຫລາຍຊະນິດ. ນອກຈາກນີ້ຍັງ ຊ່ວຍປ້ອງກັນ ການເສື່ອມຂອງ ຈຸລັງຕ່າງໆ ໃນຮ່າງກາຍໄດ້ ເປັນຢ່າງດີ ດັ່ງນັ້ນເຮົາຄວນກິນ ອາຫານທີ່ມີເຫັດ ເປັນສ່ວນ ປະກອບຫລາຍໆ. ເຕົາຫູ້ ສາມາດນຳໄປຕັດ ແປງເປັນອາຫານໄດ້ຫລາຍຊະນິດ ເພື່ອທົດແທນ ຊີ້ນສັດ, ລາຄາບໍ່ແພງ ທັງມີລົດຊາດ ທີ່ແຊບ ແລະ ດີສຸຂະພາບ, ບໍ່ມີລົດຊາດຫວານ ແລະ ເຄັມ ເໝາະກັບຄົນ ທີ່ຢາກຄວບຄຸມ ນໍ້າຕານ ໃນຮ່າງກາຍ ແລະ ທີ່ ສຳຄັນໂປຕີນສູງທີ່ສຸດ.
ເມື່ອຮູ້ແນວນີ້ແລ້ວ ທ່ານຜູ້ອ່ານ ທີ່ຄິດຈະກິນ ອາຫານເຈ ຫລື ກິນອາຫານເຈ ຢູ່ແລ້ວກໍຄວນກິນ ອາຫານທີ່ມີສ່ວນ ປະກອບຂອງສິ່ງທີ່ເວົ້າມາ ໃຫ້ຫລາຍໆ ເພື່ອເຮັດໃຫ້ ຮ່າງກາຍໄດ້ຮັບສານອາຫານ ພຽງພໍ ແລະ ດີຕໍ່ສຸຂະພາບ ນຳອີກ.
ທີ່ມາ: KPL
No comments