ໂຄງການຜະລິດຫວາຍ ແລະ ໄມ້ປ່ອງຊ່ວຍສ້າງ ລາຍຮັບ ໃຫ້ປະຊາຊົນແບບຍືນຍົງ

ໂຄງການດັ່ງກ່າວ, ເປັນຜົນດີຕໍ່ການພັດທະນາເສດຖະກິດສັງຄົມ ໃນເຂດຊົນນະບົດຫ່າງໄກສອກຫລີກ ໃຫ້ດີຂຶ້ນເທື່ອລະກ້າວ ແລະ ຊ່ວຍໃຫ້ປະຊາຊົນ

ຂປລ. ການຈັດປະຕິບັດຕັ້ງໂຄງການຜະລິດ ແລະ ເກັບກູ້ຫວາຍ ແລະ ໄມ້ປ່ອງແບບຍືນຍົງ ຢູ່ແຂວງ ບໍລິຄຳໄຊ, ສາລະວັນ ແລະ ​ແຂວງເຊກອງ ໄດ້ມີການພັດທະນາຢ່າງເປັນລະບົບ ແລະ ຕິດພັນກັບການສ້າງວຽກ ເຮັດງານທຳ ໃຫ້ແກ່ປະຊາຊົນ, ພ້ອມທັງເປັນກິດຈະກໍາໜຶ່ງ ທີ່ຕອບສະໜອງນະໂຍບາຍ ການນຳໃຊ້ຊັບ ພະຍາກອນທຳ​ມະ​ຊາດ ແບບຍືນຍົງ.

         ທ່ານ ວິໄລວົງ ວົງຄຳຊາວ ຫົວໜ້າສະຖາບັນຄົ້ນຄວ້າກະສິກຳ ແລະ ປ່າໄມ້ແຫ່ງຊາດ ກ່າວໃນກອງປະຊຸມ ຜົນການຈັດຕັ້ງປະຕິບັດໂຄງການດັ່ງກ່າວ ໄລຍະທີ IV ໃນວັນທີ 31 ສິງຫາ 2017 ທີ່ ແຂວງບໍລິຄຳໄຊ ວ່າ: ປັດຈຸບັນ ມີປະຊາຊົນຈຳນວນ 28 ບ້ານ ຢູ່ໃນ 7 ເມືອງ ຂອງສາມແຂວງດັ່ງ ກ່າວ, ໄດ້ຮັບຜົນປະໂຫຍດ ຈາກໂຄງການຜະລິດ ແລະ ເກັບກູ້ຫວາຍ ແລະ ໄມ້ປ່ອງແບບຍືນຍົງ ສຳລັບໄລຍະທີ IV (2014-2017).

ໂຄງການດັ່ງກ່າວ, ເປັນຜົນດີຕໍ່ການພັດທະນາເສດຖະກິດສັງຄົມ ໃນເຂດຊົນນະບົດຫ່າງໄກສອກຫລີກ ໃຫ້ດີຂຶ້ນເທື່ອລະກ້າວ ແລະ ຊ່ວຍໃຫ້ປະຊາຊົນ ມີແນວຄິດຢາກຫວງແຫນ, ຄຸ້ມຄອງ ແລະ ນຳໃຊ້ຊັບພະຍາກອນ ປ່າໄມ້ແບບຍືນຍົງ. ການຄຸ້ມຄອງຫວາຍ ແລະ ໄມ່ປ່ອງແບບຍືນຍົງ ເປັນວຽກງານໜຶ່ງ ທີ່ເປັນບູລິມະສິດ ໃນການພັດທະນາປ່າໄມ້ບ້ານ, ຊຶ່ງເປັນທາງເລືອກທີ່ສາມາດສ້າງລາຍຮັບທີ່​ຍືນ​ຍົງ ໃຫ້ປະຊາຊົນ, ສ້າງຄວາມເຂັ້ມແຂງ ໃຫ້ແກ່ປະຊາຊົນ ແລະ ອຳນາດການປົກຄອງທ້ອງຖິ່ນ ເພື່ອພັດທະນາກົນໄກ ການປົກປັກຮັກສາ ຊັບພະຍາກອນປ່າໄມ້ໃຫ້ຍືນຍົງ.

ໂຄງການດັ່ງກ່າວ, ປະຊາຊົນມີລາຍຮັບ ຈາກການຂາຍຫວາຍ, ເບ້ຍຫວາຍ, ແກ່ນຫວາຍ, ຍອດຫວາຍ, ແລະ ຜະລິດຕະພັນຫັດຖະກຳຈາກຫວາຍ ແລະ ໄມ່ປ່ອງ. ສະເພາະປະຊາຊົນຢູ່ເມືອງ ຄໍາເກີດ 45 ຄອບຄົວ, ສາມາດສ້າງລາຍຮັບ ຈາກການຂາຍຍອດຫວາຍ ສະເລ່ຍປະມານ 600.000 - 15.000.000 ກີບ/ປີ/ຄອບຄົວ. ຜະລິດຕະພັນຫັດຖະກໍາຫວາຍ ຂອງເມືອງຄໍາເກີດ ແລະ ເມືອງບໍລິຄັນ ໄດ້ເຂົ້າເຖິງຕະຫລາດຕ່າງປະເທດ ຄື: ປະເທດ ສະວິດເຊີແລນ, ສະວີເດັນ ແລະ ຕະຫລາດ ໃນພາກພື້ນ. ​ໂດຍໂຄງການດັ່ງກ່າວ, ໄດ້ຮັບການສະໜັບສະໜູນຈາກ ອົງການໄອເກຍ (IKEA) ແລະ ອົງການຮ່ວມມື ເພື່ອການພັດທະນາ ປະເທດສະວິດເຊີແລນ, ຊຶ່ງເລີ່ມຈັດຕັ້ງປະ ຕິບັດມາແຕ່ປີ 2006.

ຂ່າວ: ສິງຄຳ, ພາບ: ສຸກທະວີ
ເນື້ອໃນ: ຂປລ