ສາທາເມືອງໄຊພູທອງ ປະຕິບັດ 5 ກິດຈະກໍາ ເຝົ້າລະວັງໄຂ້ຍຸງລາຍ

ຂປລ. ຕາມການໃຫ້ສຳພາດຂອງ ທ່ານ ພູມີ ບານສຸວັນ ຫົວໜ້າຫ້ອງການສາທາລະນະສຸກ ເມືອງໄຊພູທອງ ​ແຂວງ​ສະຫວັນ​ນະ​ເຂດ ​ໃນ​ວັນ​ທີ 7 ສິງຫາ 2017 ນີ້ວ່າ:  ປັດຈຸບັນສະ ພາບການແຜ່ລະບາດ ຂອງພະຍາດໄຂ້ເລືອດອອກ ຢູ່ເມືອງໄຊພູທອງ ໃນຈຳນວນ 5 ບ້ານເປົ້າໝາຍ ​ເຊິ່ງ​ໄດ້​ກວດ​ພົບ​ຜູ້​ຕິດ​ເຊື້ອ​ໄຂ້ເລືອດອອກ ຈຳນວນ 15 ກໍລະນີ ຍັງບໍ່ມີຜູ້ເສຍຊີວິດ. ຕໍ່​ກັບ​ສະພາບ ​ການ​ດັ່ງກ່າວ ຫ້ອງການ​ສາທາລະນະ​ນຸກ​ເມືອງ​ ໄດ້​ປະຕິບັດ 5 ກິດຈະກຳ​ຫລັກ ​ເພື່ອ​ຕິດຕາມ​ ​ແລະ ​ເຝົ້າ​ລະວັງ.

ການ​ປະຕິບັດ 5 ກິດຈະກຳ​ດັ່ງກ່າວ​ນັ້ນ ປະກອບ​ມີ:  ເມື່ອມີການລາຍງານການ​ເກີດ​ພະຍາດ​ດັ່ງກ່າວ ແມ່ນບໍ່ໃຫ້ກາຍ 6 ຊົ່ວໂມງ ໃຫ້ທີ​ມງານລົງເຖິງທ້ອງຖິ່ນ ບ່ອນທີ່ມັນເກີດ; ສຳ ຫລວດເບິ່ງຄວາມໜາແໜ້ນ ຂອງໜອນນ້ຳ; ປະສານກັບອໍານາດການປົກຄອງບ້ານ ​ເພື່ອລາຍງານສະພາບ ພ້ອມ​ທັງຊີ້ນຳນຳພາໃຫ້ ພໍ່ແມ່ປະຊາຊົນປະຕິບັດ ຫລັກການອານາໄມສາມສະອາດ ​ໂດຍ​ເນັ້ນໃສ່ແຫລ່ງ ເພາະພັນຂອງຍຸງລາຍ ບ່ອນທີ່ມີປ່າຮົກເຮື້ອ, ກະໂປະ, ກະປ໋ອງ​ ແລະ ພາຊະນະ​ທີ່​ມີ​ນ້ຳ​ຂັງ; ໃນເມື່ອສຳຫລວດ ແລະ ທຳລາຍແຫລ່ງເພາະພັນ ຂອງ​ຍຸງ​ລາຍ​ແລ້ວ ຕ້ອງໄດ້ເອົາຊາຍອັບເດດ ມາ​ແຈກຢາຍ​ໃຫ້ ​ແຕ່​ລະ​ຄອບຄົວ ​ເພື່ອ​ຂ້າ​ໜອນ​ນ້ຳ ​ແລະ ໃນກໍລະນີມີ​ໜອນ​ນຳ ​ແລະ ຍຸງ​ລາຍ ​ເປັນ​ຈຳນວນ​ຫລາຍ ຕ້ອງ​ໄດ້ປະຕິບັັດການພົ່ນຢາ.

ຜ່ານ​ການຈັດ​ຕັ້ງ​ປະຕິບັດ​ຕາມ 5 ກິດ​ຈະກຳ ​ເຫັນວ່າ ມາຮອດເດືອນສິງຫານີ້ ສະພາບການລະບາດຂອງພະຍາດໄຂ້ເລືອດອອກ ໃນຈຳນວນບ້ານ 5 ບ້ານ ແມ່ນໄດ້ຢຸດສະຫງັດແລ້ວ. ສຳລັບບ້ານທີ່ມີຄວາມສ່ຽງ ນັ້ນທີມງານຄຸ້ມຄອງສາທາລະນະສຸກຂັ້ນເມືອງ ໄດ້ເອົາຊາຍອັບເດດ ພ້ອມ​ທັງ​ປະຕິບັດຫລັກ ການອານາໄມສາມສະອາດ ໃນ 40 ບ້ານຢ່າງທົ່ວເຖິງ.